isi surat se taskin-e-dil-e-nashad karte hain

isī sūrat se taskīn-e-dil-e-nāshād karte haiñ

abhī tak yaad aate ho abhī tak yaad karte haiñ

tabāhī par hamārī shikva-e-sayyād karte haiñ

chaman meñ haiñ kuchh aise bhī jo ham ko yaad karte haiñ

mohabbat naam hai us kā ta.alluq naam hai us kā

na ham āzād hote haiñ na vo āzād karte haiñ

vafā kā naam jab uTh jā.egā bedard duniyā se

vo ro.eñge bahut ham ko jo ab barbād karte haiñ

zamāne se nirālā hai karam sayyād-o-gulchīñ kā

jalā kar āshiyāñ kahte haiñ ab āzād karte haiñ

qafas hī ab nasheman hai qafas hī sahn-e-gulshan hai

asīroñ se kaho kyuuñ minnat-e-sayyād karte haiñ

samajh rakkhā hai bāzīcha unhoñ ne dil kī duniyā ko

kabhī ābād karte haiñ kabhī barbād karte haiñ

kabhī apnā samajh kar jin ko siine se lagāyā thā

ajab aalam hai 'ārif' vo hameñ barbād karte haiñ

isi surat se taskin-e-dil-e-nashad karte hain

abhi tak yaad aate ho abhi tak yaad karte hain

tabahi par hamari shikwa-e-sayyaad karte hain

chaman mein hain kuchh aise bhi jo hum ko yaad karte hain

mohabbat nam hai us ka talluq nam hai us ka

na hum aazad hote hain na wo aazad karte hain

wafa ka nam jab uTh jaega bedard duniya se

wo roenge bahut hum ko jo ab barbaad karte hain

zamane se nirala hai karam sayyaad-o-gulchin ka

jala kar aashiyan kahte hain ab aazad karte hain

qafas hi ab nasheman hai qafas hi sahn-e-gulshan hai

asiron se kaho kyun minnat-e-sayyaad karte hain

samajh rakkha hai bazicha unhon ne dil ki duniya ko

kabhi aabaad karte hain kabhi barbaad karte hain

kabhi apna samajh kar jin ko sine se lagaya tha

ajab aalam hai 'arif' wo hamein barbaad karte hain