isi tamanna mein dil ka charagh jalta hai

isī tamannā meñ dil kā charāġh jaltā hai

ki us ke nuur se ehsās-e-ġham sañbhaltā hai

hujūm-e-ranj-o-mehan meñ qazā ko bahlāyā

ki vaqt saañs ke naqsh-e-qadam pe chaltā hai

kisī kī gardish-e-ayyām par nazar na rahī

ki shaam hote hī sūraj bhī roz Dhaltā hai

ye dard azmat-e-imkāñ kī had se bāhar hai

ye zaḳhm vo hai jo āġhosh-e-ġham meñ paltā hai

muġhāltoñ meñ añdheroñ ke zindagī guzrī

milī hai raushnī jab bhī to dam nikaltā hai

ye niiñd palkoñ kā jo fāsla hai rahne de

bas is tarah tire vahshī kā dil bahaltā hai

kiyā hai aise masā.il ne muztarib dil ko

har ek ashk-e-'shafaq' ġham kā ruḳh badaltā hai

isi tamanna mein dil ka charagh jalta hai

ki us ke nur se ehsas-e-gham sanbhalta hai

hujum-e-ranj-o-mehan mein qaza ko bahlaya

ki waqt sans ke naqsh-e-qadam pe chalta hai

kisi ki gardish-e-ayyam par nazar na rahi

ki sham hote hi suraj bhi roz Dhalta hai

ye dard azmat-e-imkan ki had se bahar hai

ye zaKHm wo hai jo aaghosh-e-gham mein palta hai

mughaalton mein andheron ke zindagi guzri

mili hai raushni jab bhi to dam nikalta hai

ye nind palkon ka jo fasla hai rahne de

bas is tarah tere wahshi ka dil bahalta hai

kiya hai aise masail ne muztarib dil ko

har ek ashk-e-'shafaq' gham ka ruKH badalta hai