isi tarkib se KHud ko tan-asani mein rakhta hun

isī tarkīb se ḳhud ko tan-āsānī meñ rakhtā huuñ

mayassar jo nahīñ us ko farāvānī meñ rakhtā huuñ

kabhī ḳhud bhī nahīñ hotā huuñ apnī bazm-e-zātī meñ

bahut hī ḳhaas logoñ ko suḳhan-dānī meñ rakhtā huuñ

nahīñ jo aane detā rabt kirdār aur kahānī meñ

tamāsha-bīn ko apne pareshānī meñ rakhtā huuñ

jhukā.e bin yahāñ raushan hue jaate haiñ dar saare

ik aisī bhī chamak maiñ apnī peshānī meñ rakhtā huuñ

kisī be-jān patthar ko pashemāñ itnā kyā karnā

so apne ā.inoñ ko hī pashemānī meñ rakhtā huuñ

kisī ke 'aks aur bar-'aks kā ik khel hai 'nāzir'

qadam ākāsh meñ haiñ aur nazar paanī meñ rakhtā huuñ

isi tarkib se KHud ko tan-asani mein rakhta hun

mayassar jo nahin us ko farawani mein rakhta hun

kabhi KHud bhi nahin hota hun apni bazm-e-zati mein

bahut hi KHas logon ko suKHan-dani mein rakhta hun

nahin jo aane deta rabt kirdar aur kahani mein

tamasha-bin ko apne pareshani mein rakhta hun

jhukae bin yahan raushan hue jate hain dar sare

ek aisi bhi chamak main apni peshani mein rakhta hun

kisi be-jaan patthar ko pasheman itna kya karna

so apne aainon ko hi pashemani mein rakhta hun

kisi ke 'aks aur bar-'aks ka ek khel hai 'nazir'

qadam aakash mein hain aur nazar pani mein rakhta hun