itna hua zamin pe huwaida kiya mujhe

itnā huā zamīñ pe huvaidā kiyā mujhe

aur us ke baad bhiiḌ meñ tanhā kiyā mujhe

maiñ mo'atabar kise kahūñ nā-mo'tabar kise

har shaḳhs ne hī shahr meñ sajda kiyā mujhe

taḳhlīq kar ke ḳhuld-e-barīñ ke liye mirī

ḳhāliq ne pahle zīnat-e-duniyā kiyā mujhe

merā qusūr hukm-udūlī magar sazā

be-daḳhl diiñ se rāñda-e-uqbā kiyā mujhe

tarsīl-e-zāt meñ vo tanaffus vo tasalsul

pahle shuhūd-e-kun kiyā phir lā kiyā mujhe

denī agar thiiñ saarī faqīrāna ḳhil.ateñ

kyoñ pyāla de ke tum ne shakebā kiyā mujhe

mujh ko samundaroñ meñ samāne se bair thā

qatre se jān-būjh ke dariyā kiyā mujhe

tere huzūr siis jhukāne kī der thī

hairāñ huuñ barkatoñ se ye kyā kyā kiyā mujhe

itna hua zamin pe huwaida kiya mujhe

aur us ke baad bhiD mein tanha kiya mujhe

main mo'atabar kise kahun na-mo'tabar kise

har shaKHs ne hi shahr mein sajda kiya mujhe

taKHliq kar ke KHuld-e-barin ke liye meri

KHaliq ne pahle zinat-e-duniya kiya mujhe

mera qusur hukm-uduli magar saza

be-daKHl din se randa-e-uqba kiya mujhe

tarsil-e-zat mein wo tanaffus wo tasalsul

pahle shuhud-e-kun kiya phir la kiya mujhe

deni agar thin sari faqirana KHilaten

kyon pyala de ke tum ne shakeba kiya mujhe

mujh ko samundaron mein samane se bair tha

qatre se jaan-bujh ke dariya kiya mujhe

tere huzur sis jhukane ki der thi

hairan hun barkaton se ye kya kya kiya mujhe