itna na kar kisi ko shanasa ukheD se

itnā na kar kisī ko shanāsā ukheḌ se

kuchh log ab bhī shahr meñ rahte haiñ peḌ se

tujh-ġham ne bachpane meñ za'īfī navāz dī

varna javānī aatī hai pahle adheḌ se

āzād ghūmne de charā-gāh-e-zīst meñ

kar tausan-e-ḳhayāl ko zaḳhmī na eḌ se

kār-e-rafū-garī kī na zahmat uThā.iye

zaḳhmoñ kā ban gayā hai ta'alluq udheḌ se

zanjīr-e-pā ne qaid kiyā yuuñ dimāġh ko

phailāv kā ḳhayāl na aayā sukeḌ se

dil kī shikastagī ne batāyā jahān ko

bachtā nahīñ hai koī bhī shīsha tareḌ se

vo saañp āstīn meñ rahtā to Thiik thā

lipTā huā hai jo mire chandan ke peḌ se

phañstā hai jald sho’bada-bāzoñ ke jaal meñ

jo pahlī baar shahr meñ aayā ho kheḌ se

vo shaḳhs gar ḳhilāf hai mere to kyā huā

paḌtā nahīñ hai farq mujhe ek DeḌh se

apnī anā ke haath se hotā rahā ḳhajil

jab tak ki jaan chhūT na paa.ī khakheḌ se

jazbāt meñ na aao ki ġhārat na ho kahīñ

jitnā bhī tum ne kaam liyā hai khadeḌ se

itna na kar kisi ko shanasa ukheD se

kuchh log ab bhi shahr mein rahte hain peD se

tujh-gham ne bachpane mein za'ifi nawaz di

warna jawani aati hai pahle adheD se

aazad ghumne de chara-gah-e-zist mein

kar tausan-e-KHayal ko zaKHmi na eD se

kar-e-rafu-gari ki na zahmat uThaiye

zaKHmon ka ban gaya hai ta'alluq udheD se

zanjir-e-pa ne qaid kiya yun dimagh ko

phailaw ka KHayal na aaya sukeD se

dil ki shikastagi ne bataya jahan ko

bachta nahin hai koi bhi shisha tareD se

wo sanp aastin mein rahta to Thik tha

lipTa hua hai jo mere chandan ke peD se

phansta hai jald sho’bada-bazon ke jal mein

jo pahli bar shahr mein aaya ho kheD se

wo shaKHs gar KHilaf hai mere to kya hua

paDta nahin hai farq mujhe ek DeDh se

apni ana ke hath se hota raha KHajil

jab tak ki jaan chhuT na pai khakheD se

jazbaat mein na aao ki ghaarat na ho kahin

jitna bhi tum ne kaam liya hai khadeD se