itne jhele gae ulfat mein wo aazar ki bas

itne jhele ga.e ulfat meñ vo āzār ki bas

ruuh bhī lagne lagī hai mirī bīmār ki bas

aaj ke daur kā ai dost ye kirdār ki bas

lahja har shaḳhs kā jaise koī talvār ki bas

har taraf log barahna se nazar aate haiñ

aise hote haiñ tire shahr ke bāzār ki bas

terī marzī tū jahāñ chāhe hameñ le jaa.e

ham ne de dī hai tire haath meñ patvār ki bas

zulm sah kar bhī jo ḳhāmosh khaḌe rahte haiñ

vo sabhī hote haiñ zālim ke taraf-dār ki bas

us jagah hotī hai shaitāñ kī hukūmat yaaro

sar uThātī hai jahāñ par bhī ye takrār ki bas

aise milte haiñ sage bhaa.ī bhī ham se 'ātif'

darmiyāñ jaise khaḌī ho koī dīvār ki bas

itne jhele gae ulfat mein wo aazar ki bas

ruh bhi lagne lagi hai meri bimar ki bas

aaj ke daur ka ai dost ye kirdar ki bas

lahja har shaKHs ka jaise koi talwar ki bas

har taraf log barahna se nazar aate hain

aise hote hain tere shahr ke bazar ki bas

teri marzi tu jahan chahe hamein le jae

hum ne de di hai tere hath mein patwar ki bas

zulm sah kar bhi jo KHamosh khaDe rahte hain

wo sabhi hote hain zalim ke taraf-dar ki bas

us jagah hoti hai shaitan ki hukumat yaro

sar uThati hai jahan par bhi ye takrar ki bas

aise milte hain sage bhai bhi hum se 'atif'

darmiyan jaise khaDi ho koi diwar ki bas