iztirab-e-dil-e-bimar se Dar lagta hai

iztirāb-e-dil-e-bīmār se Dar lagtā hai

nabz kī sur.at-e-raftār se Dar lagtā hai

husn ke ishva-e-tarrār se Dar lagtā hai

laġhzish-e-fitrat-e-ḳhuddār se Dar lagtā hai

manzil-e-hashr bahut duur sahī par ab bhī

pursish-e-baḳht-e-siyahkār se Dar lagtā hai

ik alamnāk fasāna hai junūn-e-ulfat

jis kī tafsīr ke iz.hār se Dar lagtā hai

jāda-e-hosh se haT jaa.eñ na mai-kash ke qadam

jaam kī garmī-e-raftār se Dar lagtā hai

yā to nāmūs-e-mohabbat pe thā marnā bar-haq

yā to zikr-e-rasan-o-dār se Dar lagtā hai

ruḳh badal de na mohabbat kā ye āshufta-sarī

e'tibār-e-nigah-e-yār se Dar lagtā hai

ye aqīdat hī kahīñ darpai-e-āzār na ho

sharf-e-pā-bosī-e-aġhyār se Dar lagtā hai

toḌ Dāleñ na kahīñ aap mirā shīsha-e-dil

aap kī shūmī-e-guftār se Dar lagtā hai

ġham-o-ālām se is darja sarāsīma huuñ

ki mujhe aks-e-ruḳh-e-yār se Dar lagtā hai

bhuul jā.ūñ na kahīñ apnī hī hastī kā maqām

aap kī chashm-e-fusūñ-bār se Dar lagtā hai

bad-gumānī huī is darja daḳhīl-e-fitrat

un ko ab sāya-e-dīvār se Dar lagtā hai

phir barangeḳhta ho jaa.eñ na jazbāt-e-nihāñ

sho.ala-sāmānī-e-ruḳhsār se Dar lagtā hai

bāhamī rabt meñ ban jaa.e na hadd-e-fāsil

iḳhtilāfāt kī dīvār se Dar lagtā hai

kuchh to badle hue hālāt se vahshat hai 'azīm'

kuchh to bigḌe hue āsār se Dar lagtā hai

iztirab-e-dil-e-bimar se Dar lagta hai

nabz ki surat-e-raftar se Dar lagta hai

husn ke ishwa-e-tarrar se Dar lagta hai

laghzish-e-fitrat-e-KHuddar se Dar lagta hai

manzil-e-hashr bahut dur sahi par ab bhi

pursish-e-baKHt-e-siyahkar se Dar lagta hai

ek alamnak fasana hai junun-e-ulfat

jis ki tafsir ke izhaar se Dar lagta hai

jada-e-hosh se haT jaen na mai-kash ke qadam

jam ki garmi-e-raftar se Dar lagta hai

ya to namus-e-mohabbat pe tha marna bar-haq

ya to zikr-e-rasan-o-dar se Dar lagta hai

ruKH badal de na mohabbat ka ye aashufta-sari

e'tibar-e-nigah-e-yar se Dar lagta hai

ye aqidat hi kahin darpai-e-azar na ho

sharf-e-pa-bosi-e-aghyar se Dar lagta hai

toD Dalen na kahin aap mera shisha-e-dil

aap ki shumi-e-guftar se Dar lagta hai

gham-o-alam se is darja sarasima hun

ki mujhe aks-e-ruKH-e-yar se Dar lagta hai

bhul jaun na kahin apni hi hasti ka maqam

aap ki chashm-e-fusun-bar se Dar lagta hai

bad-gumani hui is darja daKHil-e-fitrat

un ko ab saya-e-diwar se Dar lagta hai

phir barangeKHta ho jaen na jazbaat-e-nihan

shoala-samani-e-ruKHsar se Dar lagta hai

bahami rabt mein ban jae na hadd-e-fasil

iKHtilafat ki diwar se Dar lagta hai

kuchh to badle hue haalat se wahshat hai 'azim'

kuchh to bigDe hue aasar se Dar lagta hai