iztirab-e-qalb hai aur ishq ka aaghaz hai

iztirāb-e-qalb hai aur ishq kā āġhāz hai

ibtidā-e-naġhma mānūs-e-shikast-e-sāz hai

kis kī ḳhalvat-gāh meñ sāmān-e-soz-o-sāz hai

aaj parvānoñ kī bharrā.ī huī āvāz hai

dahr se ka.aba se baḌh kar qalb kā aġhrāz hai

vo parastish-gāh hai ye jalva-gāh-e-nāz hai

iztirāb-e-ishq bhī hai aur firāq-e-dost bhī

bazm-e-ulfat meñ do guuna lutf-e-soz-o-sāz hai

ġhair kā muhtāj kab hai us kī ulfat kā marīz

ḳhud diyā hai dard-e-dil ḳhud hī vo chāra-sāz hai

ho gayā betāb dil jalve kisī ke dekh kar

kyā adā-e-dilrubā kyā dil-nashīñ andāz hai

vo bulāte haiñ mujhe maiñ un se hiila kyā karūñ

hai safar lambā tabī.at āj-kal nā-sāz hai

be-niyāzī dekh kar us kī baḌhā zauq-e-niyāz

ab jabīn-e-ishq hai aur āstān-e-nāz hai

kis ko dekhegā dikhā.egā vo kis kis ko jamāl

ḳhud hī vo jalva hai aur ḳhud hī tajallī-sāz hai

sang-e-asvad kā hai ik but sang-e-marmar kā hai ek

barhaman ye to batā kis but pe tujh ko naaz hai

jāntā huuñ avval-e-roz-e-azal se aaj tak

us ko mujh se hai mohabbat mujh ko us par naaz hai

izzat-o-azmat pe duniyā kī karūñ maiñ kyoñ ġhurūr

jo milā dar se tire kaafī vahī aġhrāz hai

raaz ban kar ho jo pinhāñ hai vo afsāna tirā

aur jo ban jaa.e afsāna vo merā raaz hai

kar diyā gustāḳh āḳhir us kī rahmat ne mujhe

jis kī rahmat par 'umar' har vaqt mujh ko naaz hai

iztirab-e-qalb hai aur ishq ka aaghaz hai

ibtida-e-naghma manus-e-shikast-e-saz hai

kis ki KHalwat-gah mein saman-e-soz-o-saz hai

aaj parwanon ki bharrai hui aawaz hai

dahr se kaba se baDh kar qalb ka aghraaz hai

wo parastish-gah hai ye jalwa-gah-e-naz hai

iztirab-e-ishq bhi hai aur firaq-e-dost bhi

bazm-e-ulfat mein do guna lutf-e-soz-o-saz hai

ghair ka muhtaj kab hai us ki ulfat ka mariz

KHud diya hai dard-e-dil KHud hi wo chaara-saz hai

ho gaya betab dil jalwe kisi ke dekh kar

kya ada-e-dilruba kya dil-nashin andaz hai

wo bulate hain mujhe main un se hila kya karun

hai safar lamba tabiat aaj-kal na-saz hai

be-niyazi dekh kar us ki baDha zauq-e-niyaz

ab jabin-e-ishq hai aur aastan-e-naz hai

kis ko dekhega dikhaega wo kis kis ko jamal

KHud hi wo jalwa hai aur KHud hi tajalli-saz hai

sang-e-aswad ka hai ek but sang-e-marmar ka hai ek

barhaman ye to bata kis but pe tujh ko naz hai

jaanta hun awwal-e-roz-e-azal se aaj tak

us ko mujh se hai mohabbat mujh ko us par naz hai

izzat-o-azmat pe duniya ki karun main kyon ghurur

jo mila dar se tere kafi wahi aghraaz hai

raaz ban kar ho jo pinhan hai wo afsana tera

aur jo ban jae afsana wo mera raaz hai

kar diya gustaKH aaKHir us ki rahmat ne mujhe

jis ki rahmat par 'umar' har waqt mujh ko naz hai