ja-ba-ja jab aaine rang ke pighalte hain

jā-ba-jā jab ā.īne rang ke pighalte haiñ

ḳhīra-ḳhīra aks āñkheñ ḳhushbuoñ ke malte haiñ

ham ki haiñ tafakkur kī rau samay ke dariyā meñ

mauj meñ jab aate haiñ tah ke raaz ugalte haiñ

chāñdnī kī larzish meñ do ghule-mile saa.e

apne aap meñ Duube ek saath chalte haiñ

kal talak qadam jin ke paḌ rahe the phūloñ par

aaj unhīñ ke talvoñ se ḳhaar kyoñ nikalte haiñ

shahd sā sulagtā hai dard kī mahak meñ jab

sard sard aahoñ se dil ke daaġh jalte haiñ

bhīgī bhīgī palkoñ par aag raqs kartī hai

āñsūoñ ke sho.aloñ meñ jab ḳhayāl Dhalte haiñ

aks utaar lete haiñ ruuh meñ bahāroñ kā

ham kabhī kabhī yuuñ bhī dil kī rut badalte haiñ

ja-ba-ja jab aaine rang ke pighalte hain

KHira-KHira aks aankhen KHushbuon ke malte hain

hum ki hain tafakkur ki rau samay ke dariya mein

mauj mein jab aate hain tah ke raaz ugalte hain

chandni ki larzish mein do ghule-mile sae

apne aap mein Dube ek sath chalte hain

kal talak qadam jin ke paD rahe the phulon par

aaj unhin ke talwon se KHar kyon nikalte hain

shahd sa sulagta hai dard ki mahak mein jab

sard sard aahon se dil ke dagh jalte hain

bhigi bhigi palkon par aag raqs karti hai

aansuon ke shoalon mein jab KHayal Dhalte hain

aks utar lete hain ruh mein bahaaron ka

hum kabhi kabhi yun bhi dil ki rut badalte hain