ja mohabbat se teri main hi mukar jata hun

jā mohabbat se tirī maiñ hī mukar jaatā huuñ

ḳhud tire zehn ke parde se utar jaatā huuñ

ab mirī raah meñ haa.el nahīñ hotīñ yādeñ

ab tire shahr se guzrūñ to guzar jaatā huuñ

apnī nazroñ ko zarā soch ke rakhnā mujh par

merī fitrat hai ki maiñ dil meñ utar jaatā huuñ

maiñ huuñ ujḌe hue ik zehn kā āvāra ḳhayāl

tere qadmoñ se lipaTtā huuñ sañvar jaatā huuñ

aaj ke daur meñ ḳhatra huuñ maiñ ḳhud apne liye

aisī be-ḳhauf tabī'at se bhī Dar jaatā huuñ

merī fitrat hai ijāroñ ke muḳhālif rahnā

mujh ko muTThī meñ sameTo to bikhar jaatā huuñ

ek muflis kā huuñ kirdār ki 'shāhid' aksar

maiñ kahānī kī shurū'āt meñ mar jaatā huuñ

ja mohabbat se teri main hi mukar jata hun

KHud tere zehn ke parde se utar jata hun

ab meri rah mein hael nahin hotin yaaden

ab tere shahr se guzrun to guzar jata hun

apni nazron ko zara soch ke rakhna mujh par

meri fitrat hai ki main dil mein utar jata hun

main hun ujDe hue ek zehn ka aawara KHayal

tere qadmon se lipaTta hun sanwar jata hun

aaj ke daur mein KHatra hun main KHud apne liye

aisi be-KHauf tabi'at se bhi Dar jata hun

meri fitrat hai ijaron ke muKHalif rahna

mujh ko muTThi mein sameTo to bikhar jata hun

ek muflis ka hun kirdar ki 'shahid' aksar

main kahani ki shuru'at mein mar jata hun