ja rahe the log mujhko chhoD kar jaane diye

jā rahe the log mujh ko chhoḌ kar jaane diye

phir mirī ḳhalvat ne mujh ko umr-bhar ta.ane diye

luT ga.ī apnī matā-e-jāñ to andāza huā

ḳhud hamīñ ne haq unheñ sab jaane anjāne diye

khaad paanī de sakeñ kab vaqt duniyā ne diyā

al-ġharaz gul ḳhvāhishoñ ke ham ne murjhāne diye

lutf miltā thā kabhī jab haath rakhtī thī havā

zaḳhm sahlātī rahī vo ham ne sahlāne diye

dil gañvāyā niiñd khoī kho diyā chain-o-qarār

ik ḳhatā-e-ishq kī aur kitne jurmāne diye

maut kī āġhosh meñ hī niiñd aa.ī pur-sukūñ

ishq tū ne kab hameñ bāhoñ ke sirhāne diye

vaah saaqī kyā nibhā.ī rasm-e-ahl-e-mai-kada

sab ko nazroñ ke hameñ shīshe ke paimāne diye

gar maiñ ro paḌtā to mere sabr kī tauhīn thī

zabt ne hargiz na mujh ko ashk chhalkāne diye

muflisī meñ bhī rahā jazboñ pe apne iḳhtiyār

kab mirī ġhairat ne mujh ko haath phailāne diye

karb tanhā.ī udāsī zaḳhm aañsū iztirāb

ai 'karan' ham ko mohabbat ne ye nazrāne diye

ja rahe the log mujh ko chhoD kar jaane diye

phir meri KHalwat ne mujh ko umr-bhar tane diye

luT gai apni mata-e-jaan to andaza hua

KHud hamin ne haq unhen sab jaane anjaane diye

khad pani de saken kab waqt duniya ne diya

al-gharaz gul KHwahishon ke hum ne murjhane diye

lutf milta tha kabhi jab hath rakhti thi hawa

zaKHm sahlati rahi wo hum ne sahlane diye

dil ganwaya nind khoi kho diya chain-o-qarar

ek KHata-e-ishq ki aur kitne jurmane diye

maut ki aaghosh mein hi nind aai pur-sukun

ishq tu ne kab hamein bahon ke sirhane diye

wah saqi kya nibhai rasm-e-ahl-e-mai-kada

sab ko nazron ke hamein shishe ke paimane diye

gar main ro paDta to mere sabr ki tauhin thi

zabt ne hargiz na mujh ko ashk chhalkane diye

muflisi mein bhi raha jazbon pe apne iKHtiyar

kab meri ghairat ne mujh ko hath phailane diye

karb tanhai udasi zaKHm aansu iztirab

ai 'karan' hum ko mohabbat ne ye nazrane diye