jada-e-zist pe barpa hai tamasha kaisa
jāda-e-zīst pe barpā hai tamāshā kaisā
dost bichhḌā hai har ik gaam pe kaisā kaisā
dil kā ātish-kada vīrān paḌā thā kab se
aañkh se bahne lagā aag kā dariyā kaisā
us pe to fasl-e-ḳhizāñ maar chukī hai shab-ḳhūñ
mausam-e-gul ke guzar jaane kā khaTkā kaisā
chāñd se chehre nazar aane lage haiñ kitne
khul gayā merī nigāhoñ pe darīcha kaisā
jis meñ ik ashk na ho aañkh kahāñ hai vo aañkh
buuñd paanī kī na ho jis meñ vo dariyā kaisā
be-tahāshā jo baḌhī jaatī hai sū-e-girdāb
naav ne dekh liyā us meñ kinārā kaisā
dekh mahfil meñ har ik aañkh hai nam 'yazdānī'
tū ne ye chheḌ diyā aaj fasāna kaisā
jada-e-zist pe barpa hai tamasha kaisa
dost bichhDa hai har ek gam pe kaisa kaisa
dil ka aatish-kada viran paDa tha kab se
aankh se bahne laga aag ka dariya kaisa
us pe to fasl-e-KHizan mar chuki hai shab-KHun
mausam-e-gul ke guzar jaane ka khaTka kaisa
chand se chehre nazar aane lage hain kitne
khul gaya meri nigahon pe daricha kaisa
jis mein ek ashk na ho aankh kahan hai wo aankh
bund pani ki na ho jis mein wo dariya kaisa
be-tahasha jo baDhi jati hai su-e-girdab
naw ne dekh liya us mein kinara kaisa
dekh mahfil mein har ek aankh hai nam 'yazdani'
tu ne ye chheD diya aaj fasana kaisa
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
