jadu se nikala hai na mantar se nikala

jaadū se nikālā hai na mantar se nikālā

ye ism-o-sifat lafz ke andar se nikālā

mehnat kī mujhe ḳhuub ye sauġhāt milī hai

ik gauhar-e-nāyāb samundar se nikālā

kam-zarf zamāne kī safāhat kā gilā kyā

muñh ham ne na phir qabr kī chādar se nikālā

ThanDā hī na kar deñ kahīñ mai-kash ko havā.eñ

garmī ko to phir shīsha-o-sāġhar se nikālā

sāzish koī le jaa.e na mujh ko kisī lamhe

rozī ke liye maiñ ne qadam ghar se nikālā

shāyad mirī tanhā.ī ko samjhā hai havā ne

ik giit nayā pattoñ kī sarsar se nikālā

ye soch ke saa.e meñ safar ḳhatm na ho jaa.e

sahrā kā patā dhuup ke andar se nikālā

itne bhī alam-nāk na the shaam ke saa.e

kis vahm kī ḳhātir ye junūñ sar se nikālā

jadu se nikala hai na mantar se nikala

ye ism-o-sifat lafz ke andar se nikala

mehnat ki mujhe KHub ye saughat mili hai

ek gauhar-e-nayab samundar se nikala

kam-zarf zamane ki safahat ka gila kya

munh hum ne na phir qabr ki chadar se nikala

ThanDa hi na kar den kahin mai-kash ko hawaen

garmi ko to phir shisha-o-saghar se nikala

sazish koi le jae na mujh ko kisi lamhe

rozi ke liye main ne qadam ghar se nikala

shayad meri tanhai ko samjha hai hawa ne

ek git naya patton ki sarsar se nikala

ye soch ke sae mein safar KHatm na ho jae

sahra ka pata dhup ke andar se nikala

itne bhi alam-nak na the sham ke sae

kis wahm ki KHatir ye junun sar se nikala