jag uTha jab bhi shuur-e-zat bistar chhoD ke

jaag uThā jab bhī shu.ūr-e-zāt bistar chhoḌ ke

ḳhud alag ho jā.eñge qatre samundar chhoḌ ke

TūTne tak jism se be-rabt sāñsoñ kā tilism

merī tanhā.ī kahāñ jaa.e mirā ghar chhoḌ ke

ek hī markaz pe lauT aate haiñ saare rāste

ham kidhar jaa.eñ tirā kūcha tirā dar chhoḌ ke

mausamoñ kī gard bhī jin ko na dhuñdlā kar sakī

aks vo dil par gayā hai ā.īna-gar chhoḌ ke

pai-ba-pai har ek chaal ulTī hī vo chaltā rahā

shah kahī ham ne use phir bhī ka.ī ghar chhoḌ ke

ishq ko tahrīk baḳhshe phir adā-e-sādgī

phir koī mehrunnisā dekhe kabūtar chhoḌ ke

har taraf ai 'mauj' āñgan meñ dar-o-dīvār se

dhuup utar aa.ī to ham uTThe haiñ bistar chhoḌ ke

jag uTha jab bhi shuur-e-zat bistar chhoD ke

KHud alag ho jaenge qatre samundar chhoD ke

TuTne tak jism se be-rabt sanson ka tilism

meri tanhai kahan jae mera ghar chhoD ke

ek hi markaz pe lauT aate hain sare raste

hum kidhar jaen tera kucha tera dar chhoD ke

mausamon ki gard bhi jin ko na dhundla kar saki

aks wo dil par gaya hai aaina-gar chhoD ke

pai-ba-pai har ek chaal ulTi hi wo chalta raha

shah kahi hum ne use phir bhi kai ghar chhoD ke

ishq ko tahrik baKHshe phir ada-e-sadgi

phir koi mehrunnisa dekhe kabutar chhoD ke

har taraf ai 'mauj' aangan mein dar-o-diwar se

dhup utar aai to hum uTThe hain bistar chhoD ke