jagta rahta hun aur khiDki khuli rahti hai

jāgtā rahtā huuñ aur khiḌkī khulī rahtī hai

kyā ḳhushī hai ki musībat hī paḌī rahtī hai

itnī dīvāreñ girā kar bhī yahī dekhā hai

ek dīvār mirī rah meñ khaḌī rahtī hai

baaġh meñ bikhre hue rañg bahut zālim haiñ

ba.az goshoñ meñ to vīrānī paḌī rahtī hai

hijr meñ vasl ke phal-phūl khile rahte haiñ

shāḳh bichhḌe hue mausam se bharī rahtī hai

ek vīrāna hai jo shahr ko khā jaatā hai

ek bastī hai jo jañgal meñ basī rahtī hai

ab vo ḳhush-chehra sī ḳhātūn kahāñ par hogī

fikr sī koī mire jī ko lagī rahtī hai

had se baḌhtī huī vahshat bhī ajab shai hai 'vafā'

mere chehre pe kisī ġham kī hañsī rahtī hai

mausam-e-girya guzar jaatā hai maqsūd-'vafā'

merī dīvār pe bārish kī namī rahtī hai

jagta rahta hun aur khiDki khuli rahti hai

kya KHushi hai ki musibat hi paDi rahti hai

itni diwaren gira kar bhi yahi dekha hai

ek diwar meri rah mein khaDi rahti hai

bagh mein bikhre hue rang bahut zalim hain

baz goshon mein to virani paDi rahti hai

hijr mein wasl ke phal-phul khile rahte hain

shaKH bichhDe hue mausam se bhari rahti hai

ek virana hai jo shahr ko kha jata hai

ek basti hai jo jangal mein basi rahti hai

ab wo KHush-chehra si KHatun kahan par hogi

fikr si koi mere ji ko lagi rahti hai

had se baDhti hui wahshat bhi ajab shai hai 'wafa'

mere chehre pe kisi gham ki hansi rahti hai

mausam-e-girya guzar jata hai maqsud-'wafa'

meri diwar pe barish ki nami rahti hai