jagte mein raat mujhko KHwab dikhlaya gaya

jāgte meñ raat mujh ko ḳhvāb dikhlāyā gayā

ban ke shāḳh-e-gul mirī āñkhoñ meñ lahrāyā gayā

jo masak jaa.e zarā sī ek nok-e-harf se

kyuuñ mujhe aisā libās-e-jism pahnāyā gayā

apne apne ḳhauf-ghar meñ log haiñ sahme hue

dā.ere se khīñch kar nuqte ko kyuuñ laayā gayā

ye mirā apnā badan hai yā khañDar ḳhvāboñ kā hai

jaane kis ke haath se aisā mahal Dhāyā gayā

baḌh chalī thī mauj apnī had se lekin tham ga.ī

us ne ye samjhā thā ki patthar ko pighlāyā gayā

raat ik miinā ne chūmā thā lab-e-sāġhar 'shamīm'

baat bas itnī thī jis ko ḳhuub phailāyā gayā

jagte mein raat mujh ko KHwab dikhlaya gaya

ban ke shaKH-e-gul meri aankhon mein lahraya gaya

jo masak jae zara si ek nok-e-harf se

kyun mujhe aisa libas-e-jism pahnaya gaya

apne apne KHauf-ghar mein log hain sahme hue

daere se khinch kar nuqte ko kyun laya gaya

ye mera apna badan hai ya khanDar KHwabon ka hai

jaane kis ke hath se aisa mahal Dhaya gaya

baDh chali thi mauj apni had se lekin tham gai

us ne ye samjha tha ki patthar ko pighlaya gaya

raat ek mina ne chuma tha lab-e-saghar 'shamim'

baat bas itni thi jis ko KHub phailaya gaya