jagti aankhon se kaisa saniha dekha gaya

jāgtī āñkhoñ se kaisā sāniha dekhā gayā

bādaloñ kā ġhol kuchh qatre lahū barsā gayā

jis ne apnī raushnī de kar ḳharīdī tīrgī

log kahte haiñ safar par maut ke zinda gayā

us kī ḳhātir dushmanī kis kis kī tū ne mol lī

chāñd āḳhir-kār tere husn kā gahnā gayā

jab kabhī 'aurat kī āzādī kā uTThā ġhalġhala

vaqt 'aurat ko na.ī hī beḌiyāñ pahnā gayā

jald us kī ḳhatm ho jā.egī saarī āb-o-tāb

jo adab tahzīb apnī bhuul kar likkhā gayā

maiñ ne tujh par aañkh mūñde kar liyā thā e'timād

shīsha ye TuuTā to har-sū kirchiyāñ bikhrā gayā

jo adākārī ke fan meñ bā-kamāl-o-tāq thā

sab se baḌh kar is zamāne meñ vahī chāhā gayā

kitnī rā'nā.ī thī kitnā husn thā us yaad meñ

rafta rafta zehn jis ko muntashir kartā gayā

jis ne apnī had se baḌh kar kiiñ 'humairā' ḳhvāhisheñ

bārhā vo puurā dariyā pī ke bhī pyāsā gayā

jagti aankhon se kaisa saniha dekha gaya

baadalon ka ghol kuchh qatre lahu barsa gaya

jis ne apni raushni de kar KHaridi tirgi

log kahte hain safar par maut ke zinda gaya

us ki KHatir dushmani kis kis ki tu ne mol li

chand aaKHir-kar tere husn ka gahna gaya

jab kabhi 'aurat ki aazadi ka uTTha ghalghala

waqt 'aurat ko nai hi beDiyan pahna gaya

jald us ki KHatm ho jaegi sari aab-o-tab

jo adab tahzib apni bhul kar likkha gaya

main ne tujh par aankh munde kar liya tha e'timad

shisha ye TuTa to har-su kirchiyan bikhra gaya

jo adakari ke fan mein ba-kamal-o-taq tha

sab se baDh kar is zamane mein wahi chaha gaya

kitni ra'nai thi kitna husn tha us yaad mein

rafta rafta zehn jis ko muntashir karta gaya

jis ne apni had se baDh kar kin 'humaira' KHwahishen

barha wo pura dariya pi ke bhi pyasa gaya