jam-e-gadai hath mein le nit sanj-sawere phirte hain

jām-e-gadā.ī haath meñ le nit sāñj-savere phirte haiñ

shams-o-qamar ye donoñ bhikārī husn ke tere phirte haiñ

muddat se hai aḳhtar-e-tāle.a māh-jabīñ bin gardish meñ

khol tū bāhman pothī apnī kab din mere phirte haiñ

panDit pūchho haath dikhāo faal khulāo koī par

din jo hoñ bargashta apne kis ke phere phirte haiñ

aql-o-farāsat salb hue sab haa.e junūñ re vaa.e junūñ

galiyoñ galiyoñ laḌke ham ko ghere ghere phirte haiñ

yuuñ kāñdhe par zulfeñ us kī bal khātī haiñ vaqt-e-ḳhirām

mār-e-siyah ko Daal gale meñ jaise sapere phirte haiñ

jog liyā 'āshufta' ham ne dekh laTak un zulfoñ kī

galiyoñ galiyoñ hāl-e-pareshāñ baal bikhere phirte haiñ

jam-e-gadai hath mein le nit sanj-sawere phirte hain

shams-o-qamar ye donon bhikari husn ke tere phirte hain

muddat se hai aKHtar-e-talea mah-jabin bin gardish mein

khol tu bahman pothi apni kab din mere phirte hain

panDit puchho hath dikhao fal khulao koi par

din jo hon bargashta apne kis ke phere phirte hain

aql-o-farasat salb hue sab hae junun re wae junun

galiyon galiyon laDke hum ko ghere ghere phirte hain

yun kandhe par zulfen us ki bal khati hain waqt-e-KHiram

mar-e-siyah ko Dal gale mein jaise sapere phirte hain

jog liya 'ashufta' hum ne dekh laTak un zulfon ki

galiyon galiyon haal-e-pareshan baal bikhere phirte hain