jam-e-gham aaj bhi chhalkao ki kuchh raat kaTe

jām-e-ġham aaj bhī chhalkāo ki kuchh raat kaTe

saath rakkho mujhe bahlāo ki kuchh raat kaTe

zaḳhm-e-dil maiñ ne sajā.e haiñ jigar ke ḳhuuñ se

ḳhāna-e-dil meñ chale aao ki kuchh raat kaTe

sham' kī tarh jalo dil meñ ujālā ho jaa.e

mom ban jaao pighal jaao ki kuchh raat kaTe

raqs kartā hai fazāoñ meñ tarannum kā shabāb

giit kuchh pyaar bhare gaao ki kuchh raat kaTe

tum palaT aao to shab ke bhī palaT jā.eñge din

baḳht-e-ḳhufta mirā chamkāo ki kuchh raat kaTe

hijr kī raat to kaaTe se nahīñ kaTtī hai

zikr-e-jānāñ hī meñ kho jaao ki kuchh raat kaTe

band hai ġhuncha-e-dil shāḳh-e-tamannā pe 'adīb'

gul tabassum hī ke barsāo ki kuchh raat kaTe

jam-e-gham aaj bhi chhalkao ki kuchh raat kaTe

sath rakkho mujhe bahlao ki kuchh raat kaTe

zaKHm-e-dil main ne sajae hain jigar ke KHun se

KHana-e-dil mein chale aao ki kuchh raat kaTe

sham' ki tarh jalo dil mein ujala ho jae

mom ban jao pighal jao ki kuchh raat kaTe

raqs karta hai fazaon mein tarannum ka shabab

git kuchh pyar bhare gao ki kuchh raat kaTe

tum palaT aao to shab ke bhi palaT jaenge din

baKHt-e-KHufta mera chamkao ki kuchh raat kaTe

hijr ki raat to kaTe se nahin kaTti hai

zikr-e-jaanan hi mein kho jao ki kuchh raat kaTe

band hai ghuncha-e-dil shaKH-e-tamanna pe 'adib'

gul tabassum hi ke barsao ki kuchh raat kaTe