jam-e-jamshed ka aalam hai mere sine mein

jām-e-jamshed kā aalam hai mire siine meñ

baat paidā hī nahīñ ye kisī ā.īne meñ

aañkh meñ shakl tirī nuur tirā siine meñ

aks ā.īne kā paḌtā rahā ā.īne meñ

hairatī sūrat-e-ā.īna banā baiThā huuñ

koī sūrat nazar aatī nahīñ ā.īne meñ

kījiye mujh pe zarā aur bhī hairat taarī

dekhiye aap mujhe baiTh ke ā.īne meñ

jāntā hai ki mai-e-talḳh hai sahbā-e-hayāt

haz har ik phir bhī uThātā hai use piine meñ

marne vāloñ se huī maut kī mushkil āsāñ

jiine vāloñ se madad kuchh na milī jiine meñ

nahīñ hotā hai rafū chāk-e-muqaddar har-chand

phir bhī masrūf hai har ek use siine meñ

mujh sā mahrūm-e-tamannā bhī na hogā koī

umr guzrī hai ḳhud apnā hī lahū piine meñ

ser āñkheñ raheñ kyā lutf niyat bhar jaa.e

dekhne meñ jo mazā hai vo nahīñ piine meñ

ā.ina-gar tirī ā.īna-garī jab dekhūñ

pusht-e-ā.īna bhī ā.īna ho ā.īne meñ

terī sūrat hī tire pesh-e-nazar rakhtā hai

naqs kyā ḳhaak nikāle koī ā.īne meñ

sher ban jaa.e mire lab pe jo naala aa.e

dard shāne se utar aa.e mire siine meñ

dekhne vaale bahar-rañg tujhe dekheñge

kabhī ā.īne se bāhar kabhī ā.īne meñ

tuur par hazrat-e-mūsā na jinheñ dekh sake

jalva-farmā haiñ vo anvār mire siine meñ

husn bandish hī nahīñ jauhar-e-tāsīr bhī hai

nahīñ kyā kuchh mire ash.ār ke ganjīne meñ

ḳhuun ho jaa.e na 'tālib' kahīñ ḳhuddārī kā

baal paḌ jaa.e na koī mire ā.īne meñ

jam-e-jamshed ka aalam hai mere sine mein

baat paida hi nahin ye kisi aaine mein

aankh mein shakl teri nur tera sine mein

aks aaine ka paDta raha aaine mein

hairati surat-e-aina bana baiTha hun

koi surat nazar aati nahin aaine mein

kijiye mujh pe zara aur bhi hairat tari

dekhiye aap mujhe baiTh ke aaine mein

jaanta hai ki mai-e-talKH hai sahba-e-hayat

haz har ek phir bhi uThata hai use pine mein

marne walon se hui maut ki mushkil aasan

jine walon se madad kuchh na mili jine mein

nahin hota hai rafu chaak-e-muqaddar har-chand

phir bhi masruf hai har ek use sine mein

mujh sa mahrum-e-tamanna bhi na hoga koi

umr guzri hai KHud apna hi lahu pine mein

ser aankhen rahen kya lutf niyat bhar jae

dekhne mein jo maza hai wo nahin pine mein

aaina-gar teri aaina-gari jab dekhun

pusht-e-aina bhi aaina ho aaine mein

teri surat hi tere pesh-e-nazar rakhta hai

naqs kya KHak nikale koi aaine mein

sher ban jae mere lab pe jo nala aae

dard shane se utar aae mere sine mein

dekhne wale bahar-rang tujhe dekhenge

kabhi aaine se bahar kabhi aaine mein

tur par hazrat-e-musa na jinhen dekh sake

jalwa-farma hain wo anwar mere sine mein

husn bandish hi nahin jauhar-e-tasir bhi hai

nahin kya kuchh mere ashaar ke ganjine mein

KHun ho jae na 'talib' kahin KHuddari ka

baal paD jae na koi mere aaine mein