jam Khaali hain mai-e-nab kahan se laun

jaam ḳhālī haiñ mai-e-nāb kahāñ se lā.ūñ

aap kā dīda-e-pur-āb kahāñ se lā.ūñ

kah sakūñ un kī nigāhoñ kā tabassum jis ko

ek aisā dil-e-be-tāb kahāñ se lā.ūñ

ishq ḳhud apnī jagah par hai mukammal lekin

husn kā jauhar-e-nāyāb kahāñ se lā.ūñ

sāmnā tum se mohabbat meñ jo ho jaa.e kabhī

ik nayā ālam-e-asbāb kahāñ se lā.ūñ

ka.aba-o-dair kī rāhoñ se guzar jaatā huuñ

mahfil-e-nāz ke ādāb kahāñ se lā.ūñ

ek hī baar nasheman pe girī hai bijlī

bārhā gulshan-e-shādāb kahāñ se lā.ūñ

jo kabhī un kī tavajjoh kā natīja thī 'shajī.a'

phir vahī kaifiyat-e-ḳhvāb kahāñ se lā.ūñ

jam KHali hain mai-e-nab kahan se laun

aap ka dida-e-pur-ab kahan se laun

kah sakun un ki nigahon ka tabassum jis ko

ek aisa dil-e-be-tab kahan se laun

ishq KHud apni jagah par hai mukammal lekin

husn ka jauhar-e-nayab kahan se laun

samna tum se mohabbat mein jo ho jae kabhi

ek naya aalam-e-asbab kahan se laun

kaba-o-dair ki rahon se guzar jata hun

mahfil-e-naz ke aadab kahan se laun

ek hi bar nasheman pe giri hai bijli

barha gulshan-e-shadab kahan se laun

jo kabhi un ki tawajjoh ka natija thi 'shajia'

phir wahi kaifiyat-e-KHwab kahan se laun