jaan apni chali jae hai jae se kisu ke

jaan apnī chalī jaa.e hai jaa.e se kisū ke

aur jaan meñ jaan aa.e hai aa.e se kisū ke

vo aag lagī paan chabā.e se kisū ke

ab tak nahīñ bujhtī hai bujhā.e se kisū ke

bujhne de zarā ātish-e-dil aur na bhaḌkā

mehñdī na lagā yaar lagā.e se kisū ke

kyā soiye phir ġhul hai dar-e-yār pe shāyad

chauñkā hai vo zanjīr hilā.e se kisū kī

kah do na uThā.e vo mujhe paas se apne

jī baiThā hī jaatā hai uThā.e se kisū kī

jab maiñ ne kahā aa.iye man jā.egī bolī

ham aur bhī rūTheñge manā.e se kisū kī

chuppī meñ jo kuchh baat kī maiñ ne to ye bolī

ham to nahīñ dabne kī dabā.e se kisū kī

yaaro na charāġh aur na maiñ sham' huuñ lekin

har shaam ko jaltā huuñ jalā.e se kisū kī

paatā nahīñ ghar us kā samajhtā hī nahīñ maiñ

us bait ke mā'nī bhī batā.e se kisū kī

jab us se kahā merī sifārish meñ kisū ne

hāsil bhī rulā.e se kuḌhā.e se kisū kī

ik ta.an se ye hañs ke lagā kahne ki be-shak

ham rolte motī haiñ rulā.e se kisū kī

kahtā hai ki 'ehsāñ' na kahegā to sunegā

matla' ye kahā maiñ ne kahā.e se kisū kī

jaan apni chali jae hai jae se kisu ke

aur jaan mein jaan aae hai aae se kisu ke

wo aag lagi pan chabae se kisu ke

ab tak nahin bujhti hai bujhae se kisu ke

bujhne de zara aatish-e-dil aur na bhaDka

mehndi na laga yar lagae se kisu ke

kya soiye phir ghul hai dar-e-yar pe shayad

chaunka hai wo zanjir hilae se kisu ki

kah do na uThae wo mujhe pas se apne

ji baiTha hi jata hai uThae se kisu ki

jab main ne kaha aaiye man jaegi boli

hum aur bhi ruThenge manae se kisu ki

chuppi mein jo kuchh baat ki main ne to ye boli

hum to nahin dabne ki dabae se kisu ki

yaro na charagh aur na main sham' hun lekin

har sham ko jalta hun jalae se kisu ki

pata nahin ghar us ka samajhta hi nahin main

us bait ke ma'ni bhi batae se kisu ki

jab us se kaha meri sifarish mein kisu ne

hasil bhi rulae se kuDhae se kisu ki

ek tan se ye hans ke laga kahne ki be-shak

hum rolte moti hain rulae se kisu ki

kahta hai ki 'ehsan' na kahega to sunega

matla' ye kaha main ne kahae se kisu ki