jaan-bazon ke lab par bhi ab aish ka nam aaya

jāñ-bāzoñ ke lab par bhī ab aish kā naam aayā

jis haath meñ tesha thā us haath meñ jaam aayā

ik taaza taġhayyur hai tahzīb kī duniyā meñ

yā husn-e-haqīqī ko andāz-e-ḳhirām aayā

rāhat kā tasavvur hī baaqī na rahā shāyad

hoñToñ pe takalluf se ārām kā naam aayā

kuchh soch ke ik rāh-e-pur-ḳhār se guzrā thā

kāñTe bhī na raas aa.e dāman bhī na kaam aayā

saaqī ye harīfoñ ko pahchān ke denā kyā

jab bazm se ham nikle tab daur meñ jaam aayā

is tīra-nasībī meñ kirnoñ kā sahārā kyā

sūraj kī taraf dekhā vo bhī lab-e-bām aayā

ye rāz-o-niyāz-e-ġham kuchh vo bhī samajhte haiñ

jab choT paḌī dil par palkoñ ko salām aayā

ġham aur ḳhushī donoñ har roz ke mehmāñ haiñ

ye sub.h-ba-sub.h aa.ī vo shām-ba-shām aayā

pheñke hue shīshoñ se dil kitne banā.e haiñ

jab jaam koī TuuTā dīvānoñ ke kaam aayā

kānoñ meñ kuchh aatī hai āvāz phaḌakne kī

phir koī nayā taa.ir shāyad tah-e-dām aayā

ash.ār-e-'nushūr' aksar un kī bhī zabāñ par haiñ

chup rah na sakā koī jab vaqt-e-kalām aayā

jaan-bazon ke lab par bhi ab aish ka nam aaya

jis hath mein tesha tha us hath mein jam aaya

ek taza taghayyur hai tahzib ki duniya mein

ya husn-e-haqiqi ko andaz-e-KHiram aaya

rahat ka tasawwur hi baqi na raha shayad

honTon pe takalluf se aaram ka nam aaya

kuchh soch ke ek rah-e-pur-KHar se guzra tha

kanTe bhi na ras aae daman bhi na kaam aaya

saqi ye harifon ko pahchan ke dena kya

jab bazm se hum nikle tab daur mein jam aaya

is tira-nasibi mein kirnon ka sahaara kya

suraj ki taraf dekha wo bhi lab-e-baam aaya

ye raaz-o-niyaz-e-gham kuchh wo bhi samajhte hain

jab choT paDi dil par palkon ko salam aaya

gham aur KHushi donon har roz ke mehman hain

ye subh-ba-subh aai wo sham-ba-sham aaya

phenke hue shishon se dil kitne banae hain

jab jam koi TuTa diwanon ke kaam aaya

kanon mein kuchh aati hai aawaz phaDakne ki

phir koi naya tair shayad tah-e-dam aaya

ashaar-e-'nushur' aksar un ki bhi zaban par hain

chup rah na saka koi jab waqt-e-kalam aaya