jaan-e-bahaar-e-zindagi aankhen zara milae ja

jān-e-bahār-e-zindagī āñkheñ zarā milā.e jā

gulshan-e-qalb par mire barq-e-nazar girā.e jā

apnā mujhe banā.e jā dil meñ mire samā.e jā

band-e-hijāb toḌ de naqsh-e-duī miTā.e jā

mutrib-e-ḳhush-navā na jā zaḳhm-e-jigar kured kar

chheḌā hai jis pe sāz-e-dil naġhma vahī sunā.e jā

mausam-e-gul kā vāsta abr-e-bahār kī qasam

jab tak girūñ na jhuum kar saaqī mujhe pilā.e jā

maanā ki thak ga.e haiñ paañv hausla-e-shabāb ke

phir bhī Thahar ke dam na le aage qadam baḌhā.e jā

Thes lage lagā kare dard uThe uThā kare

āñkhoñ se ḳhuuñ bahā kare phir bhī tū muskurā.e jā

nāz-o-niyāz-e-ishq kā ḳhatm na ho ye silsila

'nāzish'-e-ḳhasta-hāl ko hañs hañs ke tū rulā.e jā

jaan-e-bahaar-e-zindagi aankhen zara milae ja

gulshan-e-qalb par mere barq-e-nazar girae ja

apna mujhe banae ja dil mein mere samae ja

band-e-hijab toD de naqsh-e-dui miTae ja

mutrib-e-KHush-nawa na ja zaKHm-e-jigar kured kar

chheDa hai jis pe saz-e-dil naghma wahi sunae ja

mausam-e-gul ka wasta abr-e-bahaar ki qasam

jab tak girun na jhum kar saqi mujhe pilae ja

mana ki thak gae hain panw hausla-e-shabab ke

phir bhi Thahar ke dam na le aage qadam baDhae ja

Thes lage laga kare dard uThe uTha kare

aankhon se KHun baha kare phir bhi tu muskurae ja

naz-o-niyaz-e-ishq ka KHatm na ho ye silsila

'nazish'-e-KHasta-haal ko hans hans ke tu rulae ja