jaan-e-husn aur kaenat-e-rang-o-bu kya chiz hai

jān-e-husn aur kā.enāt-e-rang-o-bū kyā chiiz hai

terī qurbat kah ga.ī ai yaar tū kyā chiiz hai

vasl kī be-intihā sarmastiyoñ se pūchh lo

ki surūr-ārā husūl-e-justujū kyā chiiz hai

jaan jāoge tumhārā bhī kabhī TuuTā jo dil

ki ġham-o-dard-e-shikast-e-ārzū kyā chiiz hai

jitnī dilbar kī mire shakl-o-shamā.il hai hasīñ

itnī dilkash aur itnī ḳhūb-rū kyā chiiz hai

kaif se labrez us kī chashm-gīñ ke sāmne

sāqiyā terā ye mai-parvar subū kyā chiiz hai

chāñd hai sūraj hai phūl-o-ḳhushbū hai yā hai dhanak

bolo merī jānāñ jaisī hū-ba-hū kyā chiiz hai

mujh se mat pūchho kisī se dil lagā kar dosto

jaan lo āvārgī-e-kū-ba-kū kyā chiiz hai

maiñ ḳhamoshī ko hī behtar jāntā thā ai 'zakī'

un se bāteñ karke samjhā guftugū kyā chiiz hai

jaan-e-husn aur kaenat-e-rang-o-bu kya chiz hai

teri qurbat kah gai ai yar tu kya chiz hai

wasl ki be-intiha sarmastiyon se puchh lo

ki surur-ara husul-e-justuju kya chiz hai

jaan jaoge tumhaara bhi kabhi TuTa jo dil

ki gham-o-dard-e-shikast-e-arzu kya chiz hai

jitni dilbar ki mere shakl-o-shamail hai hasin

itni dilkash aur itni KHub-ru kya chiz hai

kaif se labrez us ki chashm-gin ke samne

saqiya tera ye mai-parwar subu kya chiz hai

chand hai suraj hai phul-o-KHushbu hai ya hai dhanak

bolo meri jaanan jaisi hu-ba-hu kya chiz hai

mujh se mat puchho kisi se dil laga kar dosto

jaan lo aawargi-e-ku-ba-ku kya chiz hai

main KHamoshi ko hi behtar jaanta tha ai 'zaki'

un se baaten karke samjha guftugu kya chiz hai