jaan jati hai meri un ko KHabar kuchh bhi nahin

jaan jaatī hai mirī un ko ḳhabar kuchh bhī nahīñ

tujh meñ o nāla-e-jāñ-soz asar kuchh bhī nahīñ

teġh-e-abrū vo dikhā kar yahī farmāte haiñ

us ke aage jo na ho sīna-sipar kuchh bhī nahīñ

hālat-e-naza.a meñ tum aa.e ho kyūñkar dekhūñ

nuur āñkhoñ meñ ab ai nūr-e-nazar kuchh bhī nahīñ

go ḳhatā.eñ nahīñ haiñ kuchh mirī par sab kuchh haiñ

zulm-o-jaur aap ke sab kuchh haiñ magar kuchh bhī nahīñ

tap-e-furqat ne yahāñ apnā kiyā kaam tamām

be-ḳhabar aaj talak tujh ko ḳhabar kuchh bhī nahīñ

rāt-din us ruḳh-o-gesū kā tasavvur hai mujhe

mashġhala is ke sivā shām-o-sahar kuchh bhī nahīñ

aarzī husn pe nāzāñ haiñ abas ye mahvash

raat bhar nuur kā aalam hai sahar kuchh bhī nahīñ

manzil-e-gor meñ kyā dekhiye ham par guzre

ġham-e-isyāñ ke sivā zād-e-safar kuchh bhī nahīñ

kyoñ yam-e-ashk meñ tū ne na Duboyā mujh ko

aabrū ab tirī o dīda-e-tar kuchh bhī nahīñ

hai bajā hech jo samjhe haiñ use sab shā.ir

ġhaur se dekhte haiñ to vo kamar kuchh bhī nahīñ

ālam-e-ḳhvāb meñ kis tarah jahāñ ko samjhūñ

kyoñ ye sab kuchh nazar aatā hai agar kuchh bhī nahīñ

āshiqī kar ke na phal pāoge hargiz 'vahbī'

naḳhl-e-ulfat meñ ba-juz dāġh-e-samar kuchh bhī nahīñ

jaan jati hai meri un ko KHabar kuchh bhi nahin

tujh mein o nala-e-jaan-soz asar kuchh bhi nahin

tegh-e-abru wo dikha kar yahi farmate hain

us ke aage jo na ho sina-sipar kuchh bhi nahin

haalat-e-naza mein tum aae ho kyunkar dekhun

nur aankhon mein ab ai nur-e-nazar kuchh bhi nahin

go KHataen nahin hain kuchh meri par sab kuchh hain

zulm-o-jaur aap ke sab kuchh hain magar kuchh bhi nahin

tap-e-furqat ne yahan apna kiya kaam tamam

be-KHabar aaj talak tujh ko KHabar kuchh bhi nahin

raat-din us ruKH-o-gesu ka tasawwur hai mujhe

mashghala is ke siwa sham-o-sahar kuchh bhi nahin

aarzi husn pe nazan hain abas ye mahwash

raat bhar nur ka aalam hai sahar kuchh bhi nahin

manzil-e-gor mein kya dekhiye hum par guzre

gham-e-isyan ke siwa zad-e-safar kuchh bhi nahin

kyon yam-e-ashk mein tu ne na Duboya mujh ko

aabru ab teri o dida-e-tar kuchh bhi nahin

hai baja hech jo samjhe hain use sab shair

ghaur se dekhte hain to wo kamar kuchh bhi nahin

aalam-e-KHwab mein kis tarah jahan ko samjhun

kyon ye sab kuchh nazar aata hai agar kuchh bhi nahin

aashiqi kar ke na phal paoge hargiz 'wahbi'

naKHl-e-ulfat mein ba-juz dagh-e-samar kuchh bhi nahin