jaan ka dushman hai magar jaan se pyara bhi hai

jaañ kā dushman hai magar jaan se pyārā bhī hai

aisā is 'ahd meñ ik shaḳhs hamārā bhī hai

jāgtī āñkhoñ ne dekhe haiñ tire ḳhvāb ai jaañ

aur nīñdoñ meñ tirā naam pukārā bhī hai

vo burā vaqt ki jab saath na ho saaya bhī

ham ne hañs hañs ke ka.ī baar guzārā bhī hai

jis ne mañjdhār meñ chhoḌā use mā'lūm nahīñ

Dūbne vaale ko tinke kā sahārā bhī hai

mat luTā denā zamāne pe hī saarī ḳhairāt

muntazir haath meñ kashkol hamārā bhī hai

naam sun kar mirā us lab pe tabassum hai 'ziyā'

aur palkoñ pe utar aayā sitāra bhī hai

jaan ka dushman hai magar jaan se pyara bhi hai

aisa is 'ahd mein ek shaKHs hamara bhi hai

jagti aankhon ne dekhe hain tere KHwab ai jaan

aur nindon mein tera nam pukara bhi hai

wo bura waqt ki jab sath na ho saya bhi

hum ne hans hans ke kai bar guzara bhi hai

jis ne manjdhaar mein chhoDa use ma'lum nahin

Dubne wale ko tinke ka sahaara bhi hai

mat luTa dena zamane pe hi sari KHairaat

muntazir hath mein kashkol hamara bhi hai

nam sun kar mera us lab pe tabassum hai 'ziya'

aur palkon pe utar aaya sitara bhi hai