jaan-kani ki to aashnai ki

jāñ-kanī kī to āshnā.ī kī

yuuñ shab-e-vasl tak rasā.ī kī

ġhair ko muñh lagāyā kab maiñ ne

dekhnā ḳhuub pārsā.ī kī

shaiḳh kī taar taar pagḌī dekh

'ishq ne 'aql se laḌā.ī kī

tū ne dil haath meñ mirā le kar

jā-ba-jā mujh pe hai ḳhudā.ī kī

hijr meñ sub.h tak are nāḳhun

ham se tū ne jigar-khudā.ī kī

ban ga.e 'jogī' ham sharāfat se

un se chup-chāp dilrubā.ī kī

hai talab daad kī nahīñ nādān

ham ne yuuñ hī ġhazal-sarā.ī kī

muḳhtasar haal thā bayāñ karnā

'jogī' ne dāstāñ-sarā.ī kī

jaan-kani ki to aashnai ki

yun shab-e-wasl tak rasai ki

ghair ko munh lagaya kab main ne

dekhna KHub parsai ki

shaiKH ki tar tar pagDi dekh

'ishq ne 'aql se laDai ki

tu ne dil hath mein mera le kar

ja-ba-ja mujh pe hai KHudai ki

hijr mein subh tak are naKHun

hum se tu ne jigar-khudai ki

ban gae 'jogi' hum sharafat se

un se chup-chap dilrubai ki

hai talab dad ki nahin nadan

hum ne yun hi ghazal-sarai ki

muKHtasar haal tha bayan karna

'jogi' ne dastan-sarai ki