jaan lab par aa gai furqat mein bas ghabra chuke

jaan lab par aa ga.ī furqat meñ bas ghabrā chuke

ab vo aa.eñ yā na aa.eñ ham to jī se jā chuke

nāz-o-andāz-o-adā ko kaam tum farmā chuke

khol kar band ab lipaT jaao bahut sharmā chuke

us ke aane kī na Thahrī sau tarah ġham khā chuke

jaan hai jaa.e kahīñ qissa miTe jhagḌā chuke

intizār un kā abas ai dil hai bas vo aa chuke

ḳhat jo bheje the javāb-e-sāf qāsid lā chuke

khīñch kar aaheñ munaġhġhas us ko kar detā hai tū

yaar ko sad baar ai dil ham manā kar lā chuke

phaaḌ kar kapḌe chale sahrā ko ham vahshat-zada

nik.hat-e-gul kī tarah ham phir ke ghar ko aa chuke

jab na ik bosa hī do tum aur na ik dushnām do

dil tumheñ kyūñkar mile aur is kī qīmat kyā chuke

mujh ko ta.ana aur mah-rūyoñ se milne kā diyā

maiñ bhī ab kuchh arz kar luuñ aap to farmā chuke

thā hijāb-e-ishq maane varna shab ko vasl meñ

haath un paañv talak sau baar ham pahuñchā chuke

dam ulaTtā hai mirā ruḳh se ulaT diije naqāb

be-hijābī se tasallī kījiye sharmā chuke

apne is dīvāna-pan se dil na baaz aaya kabhī

qaid zindāñ meñ rakhā zanjīr tak pahnā chuke

juuñ qafas sad-chāk dil hai hasrat-e-parvāz se

murġh-e-gul kā shāḳh-e-gul se ham qafas laTkā chuke

vasl kī shab hai kaf-e-pā apne sahlāne to do

hijr meñ ham se kaf-e-afsos to malvā chuke

haa.e us gul ne na kī is dil kī chāhat par nazar

zaḳhm khaa.e tan pe lākhoñ saikḌoñ gul khā chuke

nā-tavānī kā bahāna gah kiyā gah maut kā

un ke rah jaane ko ham to svāñg lākhoñ lā chuke

us ne par rahne na ham ko vaañ diyā kyā kījiye

paañv kis kis tarah us ke dar pe ham phailā chuke

said-e-ma.anī koī 'daula' apne haath aatā nahīñ

tausan-e-fikr apnā is maidāñ meñ ham dauḌā chuke

jaan lab par aa gai furqat mein bas ghabra chuke

ab wo aaen ya na aaen hum to ji se ja chuke

naz-o-andaz-o-ada ko kaam tum farma chuke

khol kar band ab lipaT jao bahut sharma chuke

us ke aane ki na Thahri sau tarah gham kha chuke

jaan hai jae kahin qissa miTe jhagDa chuke

intizar un ka abas ai dil hai bas wo aa chuke

KHat jo bheje the jawab-e-saf qasid la chuke

khinch kar aahen munaghghas us ko kar deta hai tu

yar ko sad bar ai dil hum mana kar la chuke

phaD kar kapDe chale sahra ko hum wahshat-zada

nikhat-e-gul ki tarah hum phir ke ghar ko aa chuke

jab na ek bosa hi do tum aur na ek dushnam do

dil tumhein kyunkar mile aur is ki qimat kya chuke

mujh ko tana aur mah-ruyon se milne ka diya

main bhi ab kuchh arz kar lun aap to farma chuke

tha hijab-e-ishq mane warna shab ko wasl mein

hath un panw talak sau bar hum pahuncha chuke

dam ulaTta hai mera ruKH se ulaT dije naqab

be-hijabi se tasalli kijiye sharma chuke

apne is diwana-pan se dil na baz aaya kabhi

qaid zindan mein rakha zanjir tak pahna chuke

jun qafas sad-chaak dil hai hasrat-e-parwaz se

murgh-e-gul ka shaKH-e-gul se hum qafas laTka chuke

wasl ki shab hai kaf-e-pa apne sahlane to do

hijr mein hum se kaf-e-afsos to malwa chuke

hae us gul ne na ki is dil ki chahat par nazar

zaKHm khae tan pe lakhon saikDon gul kha chuke

na-tawani ka bahana gah kiya gah maut ka

un ke rah jaane ko hum to swang lakhon la chuke

us ne par rahne na hum ko wan diya kya kijiye

panw kis kis tarah us ke dar pe hum phaila chuke

said-e-mani koi 'daula' apne hath aata nahin

tausan-e-fikr apna is maidan mein hum dauDa chuke