jaan-o-dil tujh pe luTane ko ye tayyar bhi hai

jān-o-dil tujh pe luTāne ko ye tayyār bhī hai

ishq ḳhud.dār sahī ishq vafādār bhī hai

ye to taslīm ki duniyā hai jahannum lekin

is ko firdaus bhī kahiye ki yahāñ pyaar bhī hai

yūsuf-e-vaqt kā chaltā nahīñ kyoñ aaj pata

hai zuleḳhā bhī yahāñ misr kā bāzār bhī hai

vaqt bahtā huā dariyā hai bahut tez-ḳhirām

mere hāthoñ meñ magar vaqt kī raftār bhī hai

chuum leñ shauq se ham chehra-e-lailā-e-hayāt

rū-e-gulnār bhī hai chashm-e-fusūñ-kār bhī hai

sāmne aañkh ke ik bhiiḌ hai insānoñ kī

saare majma.a meñ koī sāhib-e-kirdār bhī hai

sharm-e-isyāñ bhī hai aur ḳhauf-e-sazā bhī dil meñ

sāf-bātin hai vahī jo ki gunahgār bhī hai

isī vīrāne ko majnūñ kī nazar se dekheñ

yahī vīrāna nazar aatā chaman-zār bhī hai

jis ko dekho vahī mansūr banā phirtā hai

daur-e-haq-goī se ḳhauf-e-rasan-o-dār bhī hai

tū ne sochā bhī na hogā shab-e-furqat ke liye

chāhne vāloñ meñ us ke tirā 'muḳhtār' bhī hai

jaan-o-dil tujh pe luTane ko ye tayyar bhi hai

ishq KHuddar sahi ishq wafadar bhi hai

ye to taslim ki duniya hai jahannum lekin

is ko firdaus bhi kahiye ki yahan pyar bhi hai

yusuf-e-waqt ka chalta nahin kyon aaj pata

hai zuleKHa bhi yahan misr ka bazar bhi hai

waqt bahta hua dariya hai bahut tez-KHiram

mere hathon mein magar waqt ki raftar bhi hai

chum len shauq se hum chehra-e-laila-e-hayat

ru-e-gulnar bhi hai chashm-e-fusun-kar bhi hai

samne aankh ke ek bhiD hai insanon ki

sare majma mein koi sahib-e-kirdar bhi hai

sharm-e-isyan bhi hai aur KHauf-e-saza bhi dil mein

saf-baatin hai wahi jo ki gunahgar bhi hai

isi virane ko majnun ki nazar se dekhen

yahi virana nazar aata chaman-zar bhi hai

jis ko dekho wahi mansur bana phirta hai

daur-e-haq-goi se KHauf-e-rasan-o-dar bhi hai

tu ne socha bhi na hoga shab-e-furqat ke liye

chahne walon mein us ke tera 'muKHtar' bhi hai