jaan ye intizar kaisa hai

jaan ye intizār kaisā hai

hijr meñ bhī qarār kaisā hai

terī bātoñ kā zaḳhm hai ab tak

dekh terā shikār kaisā hai

dil kī dhaḌkan sunī to vo bole

ye khanaktā sitār kaisā hai

nabz ne lauTte hī pūchhā thā

suune dil kā dayār kaisā hai

mere aañsū use tasallī deñ

mujh ko ye us se pyaar kaisā hai

mujh meñ himmat nahīñ lagā.ūñ dil

aur dekhūñ ki pyaar kaisā hai

ruuh ke zaḳhm jism se haiñ ayaañ

pairahan tār-tār kaisā hai

phuul ke haal se maiñ vāqif huuñ

tum batāo ki ḳhaar kaisā hai

vo rakhegā mirā bharam baaqī

us pe ye e'tibār kaisā hai

jaan ye intizar kaisa hai

hijr mein bhi qarar kaisa hai

teri baaton ka zaKHm hai ab tak

dekh tera shikar kaisa hai

dil ki dhaDkan suni to wo bole

ye khanakta sitar kaisa hai

nabz ne lauTte hi puchha tha

sune dil ka dayar kaisa hai

mere aansu use tasalli den

mujh ko ye us se pyar kaisa hai

mujh mein himmat nahin lagaun dil

aur dekhun ki pyar kaisa hai

ruh ke zaKHm jism se hain ayan

pairahan tar-tar kaisa hai

phul ke haal se main waqif hun

tum batao ki KHar kaisa hai

wo rakhega mera bharam baqi

us pe ye e'tibar kaisa hai