jaana zi-bas zarur tha us jalwa-gah mein

jaanā zi-bas zarūr thā us jalva-gāh meñ

ham dair-o-kā'ba chhoḌ ga.e donoñ raah meñ

jab bosa le liyā to nahīñ gāliyoñ kā rañj

tā'zīr mahv ho ga.ī shauq-e-gunāh meñ

bikhre haiñ phuul idhar to dhare haiñ udhar ko jaam

hai bū-e-itr-e-fitna tirī ḳhvāb-gāh meñ

suufī na ḳhānqāh meñ nai rind dair meñ

majma.a hai ik jahāñ kā tirī jalva-gāh meñ

'majrūh' kahiye maiñ na hañsūñ-bolūñ tā-ba-kai

tum to sadā rahoge isī āh-āh meñ

jaana zi-bas zarur tha us jalwa-gah mein

hum dair-o-ka'ba chhoD gae donon rah mein

jab bosa le liya to nahin galiyon ka ranj

ta'zir mahw ho gai shauq-e-gunah mein

bikhre hain phul idhar to dhare hain udhar ko jam

hai bu-e-itr-e-fitna teri KHwab-gah mein

sufi na KHanqah mein nai rind dair mein

majma hai ek jahan ka teri jalwa-gah mein

'majruh' kahiye main na hansun-bolun ta-ba-kai

tum to sada rahoge isi aah-ah mein