jaane ‘aqab se tir tha kis ki kaman ka

jaane ‘aqab se tiir thā kis kī kamān kā

lete haiñ log naam kisī mehrbān kā

āshob-e-tishnagī meñ ye taskīñ bhī kam nahīñ

ehsāñ nahīñ hai sar pe kisī sā.ebān kā

dil maslahat-pasand thā shauq intihā-parast

rasta maiñ DhūñDhtā hī rahā darmiyān kā

duniyā jhalak rahī hai jo mujh meñ to kyā 'ajab

maiñ aa.ina huuñ apne zamān-o-makān kā

taslīm kar chukā huuñ muqaddar ke faisle

mujh ko nahīñ hai ḳhauf kisī imtihān kā

har dard-e-nau pe naġhma-e-tāza likheñge ham

talḳhī nahīñ mizāj hamārī zabān kā

saare sitam zamīn par ahl-e-zamīñ ke haiñ

shikva karūñ to kaise karūñ āsmān kā

uupar falak se jahl-e-'aqīdat ne kar diyā

mimbar buland vā'iz-e-sho'la-bayān kā

jaane ‘aqab se tir tha kis ki kaman ka

lete hain log nam kisi mehrban ka

aashob-e-tishnagi mein ye taskin bhi kam nahin

ehsan nahin hai sar pe kisi saeban ka

dil maslahat-pasand tha shauq intiha-parast

rasta main DhunDhta hi raha darmiyan ka

duniya jhalak rahi hai jo mujh mein to kya 'ajab

main aaina hun apne zaman-o-makan ka

taslim kar chuka hun muqaddar ke faisle

mujh ko nahin hai KHauf kisi imtihan ka

har dard-e-nau pe naghma-e-taza likhenge hum

talKHi nahin mizaj hamari zaban ka

sare sitam zamin par ahl-e-zamin ke hain

shikwa karun to kaise karun aasman ka

upar falak se jahl-e-'aqidat ne kar diya

mimbar buland wa'iz-e-sho'la-bayan ka