jaane kitne KHatron mein usne KHud ko Dala hai

jaane kitne ḳhatroñ meñ us ne ḳhud ko Daalā hai

jis ne ā.īna sach kā haath meñ sambhālā hai

zindagī to hai āsāñ sabr-o-shukr meñ rah kar

ḳhvāhishāt ne sab ko mushkiloñ meñ Daalā hai

jaane kyā ho mustaqbil qaum kā ḳhudā jaane

ab to sirf maazī kā hī bachā havāla hai

haiñ kahāñ ujāloñ kī aabrū ke rakhvāle

har taraf añdheroñ kā aaj bol-bālā hai

husn ke fusūñ-kāro thaam kar jigar baiTho

mauja-e-tabassum meñ dard Dhalne vaalā hai

pāniyoñ pe hai pahra aaj bhī yazīdoñ kā

kyoñ lagā zabānoñ par aaj sab ke taalā hai

phailtā sadāoñ kā dā.era bhī ab dekho

jhiil meñ ḳhamoshī keī sañg jab uchhālā hai

niiñd phir kahāñ aa.ī dīda-e-pareshāñ meñ

ghar se jab qadam bāhar ḳhvāb ne nikālā hai

kyā use bujhā.eñge log apnī phūñkoñ se

jis charāġh ko 'ash.har' āñdhiyoñ ne paalā hai

jaane kitne KHatron mein us ne KHud ko Dala hai

jis ne aaina sach ka hath mein sambhaala hai

zindagi to hai aasan sabr-o-shukr mein rah kar

KHwahishat ne sab ko mushkilon mein Dala hai

jaane kya ho mustaqbil qaum ka KHuda jaane

ab to sirf mazi ka hi bacha hawala hai

hain kahan ujalon ki aabru ke rakhwale

har taraf andheron ka aaj bol-baala hai

husn ke fusun-karo tham kar jigar baiTho

mauja-e-tabassum mein dard Dhalne wala hai

paniyon pe hai pahra aaj bhi yazidon ka

kyon laga zabanon par aaj sab ke tala hai

phailta sadaon ka daera bhi ab dekho

jhil mein KHamoshi kei sang jab uchhaala hai

nind phir kahan aai dida-e-pareshan mein

ghar se jab qadam bahar KHwab ne nikala hai

kya use bujhaenge log apni phunkon se

jis charagh ko 'ashhar' aandhiyon ne pala hai