jaane kya kahte hue sarw saman guzre hain

jaane kyā kahte hue sarv saman guzre haiñ

kaise hālāt se gul zer-e-chaman guzre haiñ

ab batāo ki mulāqāt bhalī yā furqat

tum pe ye hijr ke lamhe jo kaThin guzre haiñ

chāñdnī raat meñ do saa.e ba-sad-husn-e-ḳhirām

in daraḳhtoñ ke tale mahv-e-suḳhan guzre haiñ

us pe ye nuur hai dekhoge to hairat hogī

chāñd par aaj talak jitne gahan guzre haiñ

jazba-e-shauq hai bharpūr hai aur sachchā hai

saare sahrāoñ se dīvāne magan guzre haiñ

daulat-e-dard faqat us kī ināyat hī nahīñ

aur jānib se bhī kuchh ranj-o-mehan guzre haiñ

bad-gumāñ lafz the mashkūk sadā.eñ thiiñ 'nasīm'

is samā.at pe kuchh aise bhī suḳhan guzre haiñ

jaane kya kahte hue sarw saman guzre hain

kaise haalat se gul zer-e-chaman guzre hain

ab batao ki mulaqat bhali ya furqat

tum pe ye hijr ke lamhe jo kaThin guzre hain

chandni raat mein do sae ba-sad-husn-e-KHiram

in daraKHton ke tale mahw-e-suKHan guzre hain

us pe ye nur hai dekhoge to hairat hogi

chand par aaj talak jitne gahan guzre hain

jazba-e-shauq hai bharpur hai aur sachcha hai

sare sahraon se diwane magan guzre hain

daulat-e-dard faqat us ki inayat hi nahin

aur jaanib se bhi kuchh ranj-o-mehan guzre hain

bad-guman lafz the mashkuk sadaen thin 'nasim'

is samaat pe kuchh aise bhi suKHan guzre hain