jaane kya kya sochta rahta hai ye pagal man sajan

jaane kyā kyā sochtā rahtā hai ye pāgal man sājan

ḳhud ko aksar tujh meñ dekhe tū mirā darpan sājan

tere mere jaisā honā sab ke bas kī baat nahīñ

sach kahte haiñ jo kahte haiñ prem hai pāgalpan sājan

tujh ko shahroñ meñ khoyā thā lekin ab ummīd nahīñ

terī tamanna dil meñ le kar phirtā huuñ ban ban sājan

duniyā bhar kī piiḌā le kar duur kahīñ ham chal dete

kaash ke tere jaisā hotā apnā bhī dāman sājan

itnī mamtā itnī karūnā itnī chhamā aur itnā prem

tum kitne dhanvān ho dekho ham kitne nirdhan sājan

laakh dukhoñ ke parbat TuuTe phir bhī kitnā shītal hai

kaash ke tere man sā nirmal hotā merā man sājan

daulat shohrat tum ko mubārak mujh ko merā harjā.ī

baaġh baġhīche saare tumhāre merā brindavan sājan

un ko bhalā ham kyā sikhlā.eñ dukh aur sukh kī paribhāshā

jin nainoñ meñ aa jaatā hai be-mausam sāvan sājan

tū mere dīpak kī baatī tū merā jīvan sāthī

tū hī buḌhāpā tū hī javānī tū merā bachpan sājan

kal tak dil meñ thī ye tamanna log kaheñ 'vāsif' 'vāsif'

lekin ab to man kartā hai kahte raheñ sājan sājan

jaane kya kya sochta rahta hai ye pagal man sajan

KHud ko aksar tujh mein dekhe tu mera darpan sajan

tere mere jaisa hona sab ke bas ki baat nahin

sach kahte hain jo kahte hain prem hai pagalpan sajan

tujh ko shahron mein khoya tha lekin ab ummid nahin

teri tamanna dil mein le kar phirta hun ban ban sajan

duniya bhar ki piDa le kar dur kahin hum chal dete

kash ke tere jaisa hota apna bhi daman sajan

itni mamta itni karuna itni chhama aur itna prem

tum kitne dhanwan ho dekho hum kitne nirdhan sajan

lakh dukhon ke parbat TuTe phir bhi kitna shital hai

kash ke tere man sa nirmal hota mera man sajan

daulat shohrat tum ko mubarak mujh ko mera harjai

bagh baghiche sare tumhaare mera brindawan sajan

un ko bhala hum kya sikhlaen dukh aur sukh ki paribhasha

jin nainon mein aa jata hai be-mausam sawan sajan

tu mere dipak ki baati tu mera jiwan sathi

tu hi buDhapa tu hi jawani tu mera bachpan sajan

kal tak dil mein thi ye tamanna log kahen 'wasif' 'wasif'

lekin ab to man karta hai kahte rahen sajan sajan