jaane kyun log gham se Darte hain

jaane kyuuñ log ġham se Darte haiñ

ham to ālām meñ nikharte haiñ

jo ḳhushī ke sarāb meñ gum haiñ

vo ḳhushī se hī apnī marte haiñ

ġham bhī rakhte haiñ saath ḳhushiyoñ ke

zindagī meñ jo rang bharte haiñ

TuuT jaate haiñ sab ġhamoñ ke hisār

motī ḳhushiyoñ ke jab bikharte haiñ

laakh ḳhushiyāñ unheñ mubārak hoñ

ham ġhamoñ se hī dil ko bharte haiñ

Duub jaate haiñ jo kināre par

vo kahāñ Duub kar ubharte haiñ

hālat-e-dil batā.eñ ham un ko

kaise din raat ab guzarte haiñ

khul hī jaate haiñ un pe aib-o-hunar

aa.ine se jo baat karte haiñ

aa.ina dekhtā hai hairat se

vo jis andāz se sañvarte haiñ

kyā bharosa hai zindagī kā 'asar'

roz jiite haiñ roz marte haiñ

jaane kyun log gham se Darte hain

hum to aalam mein nikharte hain

jo KHushi ke sarab mein gum hain

wo KHushi se hi apni marte hain

gham bhi rakhte hain sath KHushiyon ke

zindagi mein jo rang bharte hain

TuT jate hain sab ghamon ke hisar

moti KHushiyon ke jab bikharte hain

lakh KHushiyan unhen mubarak hon

hum ghamon se hi dil ko bharte hain

Dub jate hain jo kinare par

wo kahan Dub kar ubharte hain

haalat-e-dil bataen hum un ko

kaise din raat ab guzarte hain

khul hi jate hain un pe aib-o-hunar

aaine se jo baat karte hain

aaina dekhta hai hairat se

wo jis andaz se sanwarte hain

kya bharosa hai zindagi ka 'asar'

roz jite hain roz marte hain