jaane na denge barq ko ab aashiyan se hum

jaane na deñge barq ko ab āshiyāñ se ham

nazzāra-e-bahār kareñge yahāñ se ham

sab jānte haiñ is ko kaheñ kyā zabāñ se ham

jo rabt-e-ḳhās rakhte haiñ hindostāñ se ham

rūdād-e-ishq tum ne vahīñ se sunā.ī hai

jis dāstāñ ko bhuul ga.e the jahāñ se ham

ik baat pūchhte haiñ ki baaqī rahegā kyā

uTh kar chale ga.e jo tire āstāñ se ham

gulchīñ ne fasl-e-gul ko chaman se uḌā liyā

khelā kiye tilism-e-bahār-o-ḳhizāñ se ham

rāh-e-talab meñ zauq-e-junūñ jab baḌhā to phir

aksar bichhaḌ bichhaḌ ke mile kārvāñ se ham

vo sab qafas meñ barq kī tasvīr ban ga.e

tinke sameT laa.e the jo āshiyāñ se ham

ab tak vahīñ bhaTakte haiñ arbāb-e-ārzū

naqsh-e-qadam miTā ke chale the jahāñ se ham

'shāhid' sā koī aur vafā āshnā nahīñ

kyā sun rahe haiñ aaj tumhārī zabāñ se ham

jaane na denge barq ko ab aashiyan se hum

nazzara-e-bahaar karenge yahan se hum

sab jaante hain is ko kahen kya zaban se hum

jo rabt-e-KHas rakhte hain hindostan se hum

rudad-e-ishq tum ne wahin se sunai hai

jis dastan ko bhul gae the jahan se hum

ek baat puchhte hain ki baqi rahega kya

uTh kar chale gae jo tere aastan se hum

gulchin ne fasl-e-gul ko chaman se uDa liya

khela kiye tilism-e-bahaar-o-KHizan se hum

rah-e-talab mein zauq-e-junun jab baDha to phir

aksar bichhaD bichhaD ke mile karwan se hum

wo sab qafas mein barq ki taswir ban gae

tinke sameT lae the jo aashiyan se hum

ab tak wahin bhaTakte hain arbab-e-arzu

naqsh-e-qadam miTa ke chale the jahan se hum

'shahid' sa koi aur wafa aashna nahin

kya sun rahe hain aaj tumhaari zaban se hum