jaane se pahle KHabar-dar to kar sakta tha

jaane se pahle ḳhabar-dār to kar saktā thā

mujh ko is ke liye tayyār to kar saktā thā

maiñ nihārūñ tujhe khul kar na suhūlat thī mujhe

kam se kam khul ke tū dīdār to kar saktā thā

zard jazbāt pe ik lams kā jaadū kar ke

merī hastī ko vo gulzār to kar saktā thā

jis ne har pal kiyā dāman ko mire ḳhāk-ālūd

aa.ina sā mirā kirdār to kar saktā thā

jaane kyoñ ishq ko poshīda rakhā hai us ne

vo agar chāhtā iz.hār to kar saktā thā

koī mushkil thī use pyaar jatāne meñ agar

pyaar kī mīThī sī takrār to kar saktā thā

vo gayā rūThī huī chhoḌ ke mujh ko 'sīmā'

mānñe ko mujhe lāchār to kar saktā thā

jaane se pahle KHabar-dar to kar sakta tha

mujh ko is ke liye tayyar to kar sakta tha

main nihaarun tujhe khul kar na suhulat thi mujhe

kam se kam khul ke tu didar to kar sakta tha

zard jazbaat pe ek lams ka jadu kar ke

meri hasti ko wo gulzar to kar sakta tha

jis ne har pal kiya daman ko mere KHak-alud

aaina sa mera kirdar to kar sakta tha

jaane kyon ishq ko poshida rakha hai us ne

wo agar chahta izhaar to kar sakta tha

koi mushkil thi use pyar jatane mein agar

pyar ki miThi si takrar to kar sakta tha

wo gaya ruThi hui chhoD ke mujh ko 'sima'

manne ko mujhe lachaar to kar sakta tha