jaane se tere mujh pe ye kaisa asar paDa

jaane se tere mujh pe ye kaisā asar paḌā

sadiyoñ kā jaise ho koī vīrān ghar paḌā

qissa ka.ī sadī kā phir āñkhoñ meñ aa gayā

gaañv ke rāste pe jo būḌhā shajar paḌā

sunte haiñ chāñd taare haiñ puure 'urūj par

hujre meñ āsmān magar be-ḳhabar paḌā

ik sānahe ne mujh se liyā chhīn mujh ko yuuñ

ḳhud ko bhī DhūñDhnā mujhe phir dar-ba-dar paḌā

itnī tavīl thī shab-e-yaldā ki jis ke baa'd

āḳhir pe daura dil kā hī vaqt-e-sahar paḌā

kyā kyā sunā.eñ dil kā hai ye qissa muḳhtasar

dahlīz-e-yār par rahā hai 'umr bhar paḌā

jaane se tere mujh pe ye kaisa asar paDa

sadiyon ka jaise ho koi viran ghar paDa

qissa kai sadi ka phir aankhon mein aa gaya

ganw ke raste pe jo buDha shajar paDa

sunte hain chand tare hain pure 'uruj par

hujre mein aasman magar be-KHabar paDa

ek sanahe ne mujh se liya chhin mujh ko yun

KHud ko bhi DhunDhna mujhe phir dar-ba-dar paDa

itni tawil thi shab-e-yalda ki jis ke ba'd

aaKHir pe daura dil ka hi waqt-e-sahar paDa

kya kya sunaen dil ka hai ye qissa muKHtasar

dahliz-e-yar par raha hai 'umr bhar paDa