jaanen kyon log mohabbat ki zaban bhul gae

jāneñ kyoñ log mohabbat kī zabāñ bhuul ga.e

dard-e-dil bhuul ga.e āh-e-tapāñ bhuul ga.e

ab to milte nahīñ āshufta-e-sar raste meñ

manzil-e-ishq-o-junūñ rah-guzrāñ bhuul ga.e

ham divāne the chale aa.e bayābāñ kī taraf

vo jo hushiyār the kāñToñ kā jahāñ bhuul ga.e

kitne nādāñ the dhuñdalkoñ se bahalne vaale

āshiqī bhuul ga.e soz-e-nihāñ bhuul ga.e

mo.ajiza hotī hai kahte haiñ mohabbat kī kasak

jaane ham log us afsūñ ko kahāñ bhuul ga.e

chāk-dāmānī-e-dil apnā muqaddar Thahrī

mere dāman kā rafū baḳhiya-garāñ bhuul ga.e

koī 'nāzish' ko jo pūchhe hai to kyā batlā.eñ

dil-shikasta thā bahut jaane kahāñ bhuul ga.e

jaanen kyon log mohabbat ki zaban bhul gae

dard-e-dil bhul gae aah-e-tapan bhul gae

ab to milte nahin aashufta-e-sar raste mein

manzil-e-ishq-o-junun rah-guzran bhul gae

hum diwane the chale aae bayaban ki taraf

wo jo hushiyar the kanTon ka jahan bhul gae

kitne nadan the dhundalkon se bahalne wale

aashiqi bhul gae soz-e-nihan bhul gae

moajiza hoti hai kahte hain mohabbat ki kasak

jaane hum log us afsun ko kahan bhul gae

chaak-damani-e-dil apna muqaddar Thahri

mere daman ka rafu baKHiya-garan bhul gae

koi 'nazish' ko jo puchhe hai to kya batlaen

dil-shikasta tha bahut jaane kahan bhul gae