jaanta hai tu hamari rifaton ko aasman

jāntā hai tū hamārī rif.atoñ ko āsmāñ

hai hamārī ḳhāk-e-pā se ye chamaktī kahkashāñ

kyā Darā.eñgī mujhe ye chand kaalī badliyāñ

bijliyoñ ke saa.e meñ pal kar huā huuñ maiñ javāñ

rashk se tum is tarah dekho na merā āshiyāñ

TuuT kar tum par bhī gir saktī haiñ yaaro bijliyāñ

tum jinheñ kāñTe kahā karte ho ahl-e-gulsitāñ

ismat-e-gul ke yahī hotī haiñ aksar pāsbāñ

terī mahfil meñ ḳhamoshī bhī hai merā imtihāñ

maiñ zabāñ rakhte hue bhī ho gayā huuñ be-zabāñ

baat bhī sunñā unheñ merī gavārā ab nahīñ

jin ke afsāne ko dī haiñ ḳhūn-e-dil se surḳhiyāñ

is liye pherī hai shāyad merī jānib se nazar

dekh pāoge na tum merī nigāh-e-ḳhūñ-chakāñ

ye ḳhulūs-o-mehr-o-ulfat to hasīñ alfāz haiñ

jin ke ma.anī meñ chhupī haiñ zindagī kī talḳhiyāñ

ham na hoñge phir bhī ye duniyā ise dohrā.egī

ham ne likh dī hai ġhazal meñ apne dil kī dāstāñ

bujh chukā thā terī furqat meñ dil-e-'sāqib' magar

terī yādoñ ne kiyā har gosha-e-dil zau-fishāñ

jaanta hai tu hamari rifaton ko aasman

hai hamari KHak-e-pa se ye chamakti kahkashan

kya Daraengi mujhe ye chand kali badliyan

bijliyon ke sae mein pal kar hua hun main jawan

rashk se tum is tarah dekho na mera aashiyan

TuT kar tum par bhi gir sakti hain yaro bijliyan

tum jinhen kanTe kaha karte ho ahl-e-gulsitan

ismat-e-gul ke yahi hoti hain aksar pasban

teri mahfil mein KHamoshi bhi hai mera imtihan

main zaban rakhte hue bhi ho gaya hun be-zaban

baat bhi sunna unhen meri gawara ab nahin

jin ke afsane ko di hain KHun-e-dil se surKHiyan

is liye pheri hai shayad meri jaanib se nazar

dekh paoge na tum meri nigah-e-KHun-chakan

ye KHulus-o-mehr-o-ulfat to hasin alfaz hain

jin ke mani mein chhupi hain zindagi ki talKHiyan

hum na honge phir bhi ye duniya ise dohraegi

hum ne likh di hai ghazal mein apne dil ki dastan

bujh chuka tha teri furqat mein dil-e-'saqib' magar

teri yaadon ne kiya har gosha-e-dil zau-fishan