jaante hain ahl-e-dil la-jawab hain hum log

jānte haiñ ahl-e-dil lā-javāb haiñ ham log

dahr ke shabistāñ meñ māhtāb haiñ ham log

narm garm hāthoñ meñ ik gulāb haiñ ham log

ThanDe ThanDe mausam kā āftāb haiñ ham log

dekhne meñ vaise to ik habāb haiñ ham log

haañ magar har ik lamha inqalāb haiñ ham log

ḳhuuñ ke pyāse zālim ko dil-figār qātil ko

aa.ina dikhāne meñ kāmyāb haiñ ham log

harf-o-lafz-o-ma.anī kī jis meñ bahtī hai gangā

paḌhnā chāhe to dil kī ik kitāb haiñ ham log

ilm-o-fikr-o-hikmat kī sham'eñ ham jalāte haiñ

fann-e-ilm-o-hikmat meñ be-hisāb haiñ ham log

jis ko pī ke duniyā sab jhuum jhuum uThe 'nādir'

ahl-e-haq kī mahfil kī vo sharāb haiñ ham log

jaante hain ahl-e-dil la-jawab hain hum log

dahr ke shabistan mein mahtab hain hum log

narm garm hathon mein ek gulab hain hum log

ThanDe ThanDe mausam ka aaftab hain hum log

dekhne mein waise to ek habab hain hum log

han magar har ek lamha inqalab hain hum log

KHun ke pyase zalim ko dil-figar qatil ko

aaina dikhane mein kaamyab hain hum log

harf-o-lafz-o-mani ki jis mein bahti hai ganga

paDhna chahe to dil ki ek kitab hain hum log

ilm-o-fikr-o-hikmat ki sham'en hum jalate hain

fann-e-ilm-o-hikmat mein be-hisab hain hum log

jis ko pi ke duniya sab jhum jhum uThe 'nadir'

ahl-e-haq ki mahfil ki wo sharab hain hum log