jab aadmi mudda-e-haq hai to kya kahen muddaa kahan hai

jab aadmī mudd.ā-e-haq hai to kyā kaheñ mudda.ā kahāñ hai

ḳhudā hai ḳhud jis ke dil meñ pinhāñ vo DhūñDhtā hai ḳhudā kahāñ hai

ye bazm-e-yārān-e-ḳhud-numā hai na kar ḳhulūs-e-vafā kī bāteñ

sabhī to haiñ mudda.ī vafā ke yahāñ koī bevafā kahāñ hai

tamām partav haiñ aks-e-partav tamām jalve haiñ aks-e-jalva

kahāñ se lā.ūñ misāl-e-sūrat ki aap sā dūsrā kahāñ hai

nihāñ haiñ takmīl-e-ḳhud-shanāsī meñ jalva-hā-e-ḳhudā-shanāsī

jo apnī hastī se be-ḳhabar hai vo aap se āshnā kahāñ hai

paḌī hai sunsān dil kī vaadī akelā mahv-e-talāsh huuñ maiñ

ki ishq ke rāh-rau kidhar haiñ vafāoñ kā qāfila kahāñ hai

jinheñ vasā.el pe hai bharosā ye baat un ko batā de koī

bachā le kashtī ko jo bhañvar se ḳhudā hai vo nāḳhudā kahāñ hai

paḌā hī rahne do sar-ba-sajda na chhūTne do ye āstāna

ki 'darshan'-e-ḳhasta kā Thikānā tumhāre dar ke sivā kahāñ hai

jab aadmi mudda-e-haq hai to kya kahen muddaa kahan hai

KHuda hai KHud jis ke dil mein pinhan wo DhunDhta hai KHuda kahan hai

ye bazm-e-yaran-e-KHud-numa hai na kar KHulus-e-wafa ki baaten

sabhi to hain muddai wafa ke yahan koi bewafa kahan hai

tamam partaw hain aks-e-partaw tamam jalwe hain aks-e-jalwa

kahan se laun misal-e-surat ki aap sa dusra kahan hai

nihan hain takmil-e-KHud-shanasi mein jalwa-ha-e-KHuda-shanasi

jo apni hasti se be-KHabar hai wo aap se aashna kahan hai

paDi hai sunsan dil ki wadi akela mahw-e-talash hun main

ki ishq ke rah-rau kidhar hain wafaon ka qafila kahan hai

jinhen wasael pe hai bharosa ye baat un ko bata de koi

bacha le kashti ko jo bhanwar se KHuda hai wo naKHuda kahan hai

paDa hi rahne do sar-ba-sajda na chhuTne do ye aastana

ki 'darshan'-e-KHasta ka Thikana tumhaare dar ke siwa kahan hai