jab apna saya hi dushman hai kya kiya jae

jab apnā saaya hī dushman hai kyā kiyā jaa.e

yahī to zehn kī uljhan hai kyā kiyā jaa.e

haiñ jis ke haath meñ zarre bhī māh-o-anjum bhī

usī ke haath meñ dāman hai kyā kiyā jaa.e

udaas baam pe mausam ne khol diiñ zulfeñ

kisī biyog meñ jogan hai kyā kiyā jaa.e

vo shām-e-lutf-o-tarab aur chāñdnī sā badan

isī ḳhumār meñ nāgan hai kyā kiyā jaa.e

vo apnī shoḳh adāoñ se lūTtā hai mujhe

bahut hasīn ye rahzan hai kyā kiyā jaa.e

vafā-parast hai ātish-fishāñ kā rakhvālā

sanam-kade meñ barahman hai kyā kiyā jaa.e

fareb detā hai 'ālam' pe raaj kartā hai

adū ke haath meñ har fan hai kyā kiyā jaa.e

jab apna saya hi dushman hai kya kiya jae

yahi to zehn ki uljhan hai kya kiya jae

hain jis ke hath mein zarre bhi mah-o-anjum bhi

usi ke hath mein daman hai kya kiya jae

udas baam pe mausam ne khol din zulfen

kisi biyog mein jogan hai kya kiya jae

wo sham-e-lutf-o-tarab aur chandni sa badan

isi KHumar mein nagan hai kya kiya jae

wo apni shoKH adaon se luTta hai mujhe

bahut hasin ye rahzan hai kya kiya jae

wafa-parast hai aatish-fishan ka rakhwala

sanam-kade mein barahman hai kya kiya jae

fareb deta hai 'alam' pe raj karta hai

adu ke hath mein har fan hai kya kiya jae