jab apni aankhon se ashkon ka qafila nikla

jab apnī āñkhoñ se ashkoñ kā qāfila niklā

kināre TuuTe to dariyā kā hausla niklā

vo merī bazm meñ aa.e raqīb ke hamrāh

chalo ki milne kā koī to silsila niklā

mileñ na aaj bhī bachchoñ ko roTiyāñ shāyad

vo ghar se sub.h yahī sochtā huā niklā

vo ik varaq ki mirā naam jis pe likkhā thā

tirī kitāb meñ vo kyoñ miTā miTā niklā

maiñ apne chehre pe ḳhushiyāñ sajā to laayā magar

har ek shaḳhs mire ġham se āshnā niklā

maiñ apnā haal sunāne lagā jise 'rāhī'

to us kā dard mire dard se sivā niklā

jab apni aankhon se ashkon ka qafila nikla

kinare TuTe to dariya ka hausla nikla

wo meri bazm mein aae raqib ke hamrah

chalo ki milne ka koi to silsila nikla

milen na aaj bhi bachchon ko roTiyan shayad

wo ghar se subh yahi sochta hua nikla

wo ek waraq ki mera nam jis pe likkha tha

teri kitab mein wo kyon miTa miTa nikla

main apne chehre pe KHushiyan saja to laya magar

har ek shaKHs mere gham se aashna nikla

main apna haal sunane laga jise 'rahi'

to us ka dard mere dard se siwa nikla