jab ashk teri yaad mein aankhon se Dhale hain

jab ashk tirī yaad meñ āñkhoñ se Dhale haiñ

tāroñ ke diye sūrat-e-parvāna jale haiñ

sau baar basā.ī hai shab-e-vasl kī jannat

sau baar ġham-e-hijr ke sho'loñ meñ jale haiñ

har aan umangoñ ke badalte rahe tevar

har aan mohabbat meñ na.ī raah chale haiñ

mahtāb se chehre the sitāroñ sī nigāheñ

ham log inhī chāñd sitāroñ meñ pale haiñ

noche haiñ kabhī ham ne havādis ke garebāñ

nākāmī-e-koshish pe kabhī haath male haiñ

tārīk fazāoñ ke ubharte rahe tūfāñ

phir bhī tirī yādoñ ke diye ḳhuub jale haiñ

kyā jāniye ye riñd bure haiñ ki bhale haiñ

saaqī kī nigāhoñ ke ishāroñ pe chale haiñ

mahsūs ye hotā hai ki duniyā kī bahāreñ

us gul-kada-e-nāz ke saa.e ke tale haiñ

yūñhī to dil-āvez nahīñ she'r-e-'tabassum'

ye naqsh tire husn ke sāñche meñ Dhale haiñ

jab ashk teri yaad mein aankhon se Dhale hain

taron ke diye surat-e-parwana jale hain

sau bar basai hai shab-e-wasl ki jannat

sau bar gham-e-hijr ke sho'lon mein jale hain

har aan umangon ke badalte rahe tewar

har aan mohabbat mein nai rah chale hain

mahtab se chehre the sitaron si nigahen

hum log inhi chand sitaron mein pale hain

noche hain kabhi hum ne hawadis ke gareban

nakaami-e-koshish pe kabhi hath male hain

tarik fazaon ke ubharte rahe tufan

phir bhi teri yaadon ke diye KHub jale hain

kya jaaniye ye rind bure hain ki bhale hain

saqi ki nigahon ke ishaaron pe chale hain

mahsus ye hota hai ki duniya ki bahaaren

us gul-kada-e-naz ke sae ke tale hain

yunhi to dil-awez nahin she'r-e-'tabassum'

ye naqsh tere husn ke sanche mein Dhale hain