jab be-KHudi se hosh ka yarana ho gaya

jab be-ḳhudī se hosh kā yārāna ho gayā

dair-o-haram kā naam bhī mai-ḳhāna ho gayā

in gul-ruḳhoñ ko jab se huā shauq-e-mai-kashī

jo phuul thā chaman meñ vo paimāna ho gayā

ai ham-nashīñ aziyyat-e-farzāngī na pūchh

jis meñ zarā bhī 'aql thī dīvāna ho gayā

bas us nigāh-e-nāz se milne kī der thī

jo ġham bhī dil meñ thā ġham-e-jānāna ho gayā

mere hī dil kī aag kā sho'la thā vo koī

jo intihā-e-shauq meñ parvāna ho gayā

jab aap aa ga.e ruḳh-e-tābāñ liye hue

pur-nūr zindagī kā siyah-ḳhāna ho gayā

ye raunaqeñ kahāñ mire dil ko nasīb thiiñ

ābād tere ġham se ye kāshāna ho gayā

tai ho sakā na marhala-e-shauq 'aql se

lekin ba-faiz-e-laġhzish-e-mastāna ho gayā

mai-ḳhvār shaad bhī hai bas itnī sī baat hai

itnī sī baat kā magar afsāna ho gayā

jab be-KHudi se hosh ka yarana ho gaya

dair-o-haram ka nam bhi mai-KHana ho gaya

in gul-ruKHon ko jab se hua shauq-e-mai-kashi

jo phul tha chaman mein wo paimana ho gaya

ai ham-nashin aziyyat-e-farzangi na puchh

jis mein zara bhi 'aql thi diwana ho gaya

bas us nigah-e-naz se milne ki der thi

jo gham bhi dil mein tha gham-e-jaanana ho gaya

mere hi dil ki aag ka sho'la tha wo koi

jo intiha-e-shauq mein parwana ho gaya

jab aap aa gae ruKH-e-taban liye hue

pur-nur zindagi ka siyah-KHana ho gaya

ye raunaqen kahan mere dil ko nasib thin

aabaad tere gham se ye kashana ho gaya

tai ho saka na marhala-e-shauq 'aql se

lekin ba-faiz-e-laghzish-e-mastana ho gaya

mai-KHwar shad bhi hai bas itni si baat hai

itni si baat ka magar afsana ho gaya