jab bhi bhule se kabhi lab pe hansi aai hai

jab bhī bhūle se kabhī lab pe hañsī aa.ī hai

ġham kī tasvīr mire zehn pe lahrā.ī hai

is qadar charchā hai kuchh āmad-e-fasl-e-gul kā

ḳhaar ko ḳhaar na kahne hī meñ dānā.ī hai

ban ga.ī ḳhaar sar-e-shāḳh kalī vo ik din

phuul banñe kī tamannā meñ jo murjhā.ī hai

aañkh ne dekhā nahīñ ek bhī gul ḳhanda-ba-lab

sirf kānoñ ne sunā hai ki bahār aa.ī hai

din to sāyoñ ke ta.āqub meñ guzārā lekin

phir vahī raat vahī maiñ vahī tanhā.ī hai

jab thā maiñ garm-e-safar sāyoñ se katrātā thā

thak gayā huuñ to mujhe sho.aloñ pe niiñd aa.ī hai

go maiñ begāna huuñ ḳhud zaat se apnī 'sīmāb'

merī fitrat meñ magar anjuman-ārā.ī hai

jab bhi bhule se kabhi lab pe hansi aai hai

gham ki taswir mere zehn pe lahrai hai

is qadar charcha hai kuchh aamad-e-fasl-e-gul ka

KHar ko KHar na kahne hi mein danai hai

ban gai KHar sar-e-shaKH kali wo ek din

phul banne ki tamanna mein jo murjhai hai

aankh ne dekha nahin ek bhi gul KHanda-ba-lab

sirf kanon ne suna hai ki bahaar aai hai

din to sayon ke taaqub mein guzara lekin

phir wahi raat wahi main wahi tanhai hai

jab tha main garm-e-safar sayon se katraata tha

thak gaya hun to mujhe shoalon pe nind aai hai

go main begana hun KHud zat se apni 'simab'

meri fitrat mein magar anjuman-arai hai