jab bhi KHalwat mein meri shama jali sham ke baad

jab bhī ḳhalvat meñ mirī sham.a jalī shaam ke baad

dil ke darvāze pe dastak sī huī shaam ke baad

chāñd tāroñ kī jo mahfil thī sajī shaam ke baad

mujh ko mahsūs huī terī kamī shaam ke baad

din to ḳhāmosh guzar jaatā hai apnā lekin

aa hī jaatī hai magar yaad tirī shaam ke baad

jān-e-man kuchh to ilāj-e-ġham-e-daurāñ karnā

varna baḌh jā.egī afsurda-dilī shaam ke saath

shaiḳh kī baat pe jo kar lī thī tauba ham ne

aap ke aate hī vo TuuT ga.ī shaam ke baad

vo bhī ab tak nahīñ aa.e na payām aaya hai

phone kī line bhī phir TuuT ga.ī shaam ke baad

merī tanhā.ī bhī 'shāhīn' banī hai dushman

mujh ko nāgin kī tarah Dasne lagī shaam ke baad

jab bhi KHalwat mein meri shama jali sham ke baad

dil ke darwaze pe dastak si hui sham ke baad

chand taron ki jo mahfil thi saji sham ke baad

mujh ko mahsus hui teri kami sham ke baad

din to KHamosh guzar jata hai apna lekin

aa hi jati hai magar yaad teri sham ke baad

jaan-e-man kuchh to ilaj-e-gham-e-dauran karna

warna baDh jaegi afsurda-dili sham ke sath

shaiKH ki baat pe jo kar li thi tauba hum ne

aap ke aate hi wo TuT gai sham ke baad

wo bhi ab tak nahin aae na payam aaya hai

phone ki line bhi phir TuT gai sham ke baad

meri tanhai bhi 'shahin' bani hai dushman

mujh ko nagin ki tarah Dasne lagi sham ke baad